DILI, 13 maiu 2022 (TATOLI)–Governu liuhosi reuniaun Konsellu Ministru (KM) estraordinária, sesta ne’e, delibera hodi fó poder tomak ba Ministru Transporte no Komunikasaun (MTK), José Agustinho da Silva, hodi asina akordu servisu aéreu entre Repúblika Demokrátika Timor-Leste no Nova Zelándia.
“Akordu ne’e buka atu promove sistema aviasaun internasionál bazeia ba konkorénsia entre kompañia aérea sira iha merkadu no enkoraja sira hodi dezenvolve no implementa servisu inovadór no kompetitivu sira, ho objetivu atu hadi’a komérsiu, konsumidór no moris di’ák,” Ministru Prezidénsia Konsellu Ministru, Fidelis Manuel Leite Magalhães, relata hafoin ramata reuniaun ezekutivu, iha Palásiu Governu.
Notísia relevante: Timor-Leste no Emiradu Árabe Unidu sei estabelese akordu servisu aéreu
Nune’e, akordu ne’e atu asegura grau seguransa boot liu iha transporte aéreu internasionál no afirma filafali preokupasaun atu ameasa sira hasoru seguransa aeronável, ne’ebé bele tau ba seguransa ema ka sasán nian hodi fó efetu negativu ba funsionamentu transporte aéreu no provoka deskonfiansa públika ne’ebé iha relasaun ho seguransa aviasaun sivíl.
Ministru Transporte no Komunikasaun sei asina akordu ne’e bainhira governante nova zelandéz mai Timór hodi partisipa iha selebrasaun loron restaurasaun independénsia ba da-XX iha loron 20 maiu.
“Asina tiha mak sei haruka fali mai iha Konsellu Ministru, hafoin haruka fali ba Parlamentu nasionál hodi hetan ratifikasaun,” nia akresenta.
Jornalista : Antónia Gusmão
Editora : Julia Chatarina
