HEADLINE, INTERNASIONÁL, KAPITÁL, NASIONÁL

Governu estabelese Sekretáriu Estadu Komunidade Timor-oan iha Rai-Li’ur

Governu estabelese Sekretáriu Estadu Komunidade Timor-oan iha Rai-Li’ur

Primeiru Ministru, Taur Matan Ruak, prezide reuniaun extradordinária Konsellu Ministru, iha Palásiu Governu, segunda (16/05). Imajen Tatoli/Francisco Sony

DILI, 16 maiu 2022 (TATOLI)—Governu liuhosi reuniaun Konsellu Ministru (KM) estraordinária, segunda ne’e, aprova Projetu Dekretu-Lei, ne’ebé aprezenta hosi Primeiru-Ministru, Taur Matan Ruak, kona-ba alterasaun datoluk ba Dekretu-Lei númeru 14/2018, loron 17 agostu, kona-ba orgánika Governu VIII Konstitusionál.

Aleinde ne’e, halo alterasaun daruak ba Dekretu-Lei númeru 20/2019, loron 31 jullu, kona-ba Orgánika Ministériu Negósiu Estranjeiru no Kooperasaun (MNEK).

“Alterasaun ba Dekretu-Lei númeru 14/2018, loron 17 agostu, ho objetivu atu inklui iha kompozisaun VIII Governu Konstitusionál, Sekretáriu Estadu Komunidade Timor-oan iha Rai-Li’ur,” Ministru Prezidénsia Konsellu Ministru, Fidelis Manuel Leite Magalhães, relata hafoin reuniaun ezekutivu, iha Palásiu Governu.

Notísia relevante: MNEK husu timoroan bá servisu iha Inglaterra tenke iha dokumentu kompletu

Portavóz Governu esplika, ho integrasaun Sekretáriu Estadu Komunidade Timor-oan iha Rai-Li’ur, iha kompozisaun VIII Governu Konstitusionál, ne’ebé rekoñese nesesidade no importánsia atu asegura hodi hametin lasu komunidade timor-oan iha rai-li’ur ho komunidade nasionál, nune’e mós urjénsia atu asegura mekanizmu ne’ebé efikáz liu atu envolve sidadaun ne’ebé hela no serbisu iha rai-li’ur iha prosesu dezenvolvimentu país nian.

Nune’e mós, liuhosi diploma ne’e, alterasaun daruak ba Dekretu-Lei númeru 20/2019, loron 31 jullu, kona-ba orgánika MNEK, ho forma atu garante armonizasaun ida-ne’e ho lei orgánika Governu.

Knaar prinsipál Sekretáriu Estadu ne’e mak halo akompañamentu ba komunidade timor-oan sira rai-li’iur hanesan iha Reinu Unidu, Austrália, Indonézia no fatin hotu.

“Sira timor-oan, maibé hela iha nasaun hirak ne’e entaun sira presiza akompañamentu besik liu hosi Governu, liuliu departamentu governamentál ne’ebé vokasionadu atu halo akompañamentu, nune’e timor-oan sira hela iha rai-li’ur la senti mesak,” nia tenik.

Jornalista : Antónia Gusmão

Editora     : Julia Chatarina

iklan
iklan

Leave a Reply

iklan
error: Content is protected !!