HEADLINE, NASIONÁL, SOSIEDADE SIVĺL

Governu asina akordu kuadru no subvensaun milliaun $15 ho CET

Governu asina akordu kuadru no subvensaun milliaun $15 ho CET

Membru Governu hasai foto hamutuk estrutura CET hafoin ramata selebrasaun akordu iha salaun PCM, Palásiu Governu, tersa (17/05). Imajen Tatoli/Arminda Fonseca

DILI, 17 maiu 2022 (TATOLI)–Governu liuhosi Ministru Finansa, Rui Augusto Gomes, tersa ne’e, asina akordu subvensaun anuál ho Pro-Prezidente Konferénsia Episkopál Timorense (CET sigla portugés) no atuál Arsebispu Arkidioseze Metropolitana Dili, Dom Virgílio do Carmo da Silva.

Nune’e mós, Primeiru-Ministru (PM), Taur Matan Ruak, asina akordu kuadru ba períodu tinan lima (2022-2027) ho Prezidente CET no atuál Bispu Dioseze Maliana, Dom Norberto do Amaral.

“Ohin ami asina akordu rua hanesan akordu kuadru no akordu anuál. Akordu  anuál ne’e kona-ba subvensaun ne’ebé Governu fó ba uma-kreda, ne’ebé tuir konkordata artigu 11 nian katak Governu fó tuir posibilidade, tinan ne’e Governu disponível aloka milliaun $15 ba uma CET,” Pro-Prezidente CET, Dom Virgílio, informa, hafoin partisipa serimónia selebrasaun akordu, iha salaun Prezidénsia Konsellu Ministru (PCM, sigla portugés) Palásiu Governu, tersa ne’e.

Notísia relevante: Kada tinan, Governu fó subvensaun millaun $15 ba Igreja Katólika

Primeiru-Ministru, Taur Matan Ruak, asina akordu kuadru ba períodu tinan lima ho Prezidente CET no atuál Bispu Dioseze Maliana, Dom Norberto do Amaral, iha salaun PCM, Palásiu Governu, tersa (17/05). Imajen Tatoli/Arminda Fonseca

Akordu kuadru hanesan akordu Governu Timor-Leste ho Santa Sé, ne’ebé kada tinan lima sempre renova, nune’e liuhosi akordu ne’e kada tinan Governu apoiu subvensaun tuir kbiit.

Atividade ne’ebé CET sei halo liuhosi akordu kuadru durante tinan lima, haree liu meiu ba edukasaun, sosiál, no atividade servisu igreja atu tau-matan ba servisu uma-kreda.

Hosi orsamentu milliaun $15 ne’ebé tinan ne’e aloka ba CET sei utiliza tuir akordu  ne’ebé iha katak, hosi orsamentu ne’e ba edukasaun 50%, sosiál 25%,  servisu igreja 15%.

“Prioridade mak tau-matan ba eskola no buat hotu ne’ebé uma-kreda nian, inklui tipu sosiál ne’ebé mak uma-kreda hasoru iha Timor-Leste, tanba objetivu hosi akordu kuadru mak hanesan hatuur prinsípiu no lala’ok ne’ebé durante la’o ho alokasaun orsamentu ba tinan-lima hodi regula iha akordu kuadru,” nia akresenta.

Jornalista : Arminda Fonseca

Editora     : Julia Chatarina

iklan
iklan

Leave a Reply

iklan
error: Content is protected !!