DEFEZA, HEADLINE, NASIONÁL, SEGURANSA

Membru F-FDTL no PNTL hala’o knaar iha munisípiu hetan direitu alojamentu

Membru F-FDTL no PNTL hala’o knaar iha munisípiu hetan direitu alojamentu

Membru F-FDTL hala'o marsa ho bandeira RDTL iha ámbitu komemorasaun aniversáriu Komponente Sentru Formasaun no Treinu (SFT) ba-dala 21 iha Kampu SFT Metinaru, sábadu (19/02). Imajen Tatoli/Francisco Sony

DILI, 17 maiu 2022 (TATOLI)—Primeiru-Ministru (PM) no Ministru Interiór, Taur Matan Ruak, aprezenta projetu dekretu-lei iha reuniaun Konsellu Ministru (KM) estraordinária, tersa ne’e, kona-ba atribuisaun direitu alojamentu dignu ba forsa no seguransa sira.

Nune’e, diploma ne’ebé ezekutivu sira aprova ona, sei atribui direitu ne’e ba membru FALINTIL-Forsa Defeza Timor-Leste (F-FDTL) no Polísia Nasionál Timor-Leste (PNTL), ne’ebé iha servisu ativu no efetivu, tanba razaun servisu nian tenke muda hela iha munisípiu ne’ebé la hanesan sira-nia hela-fatin abituál.

“Programa ne’e sei benefisia hirak ne’ebé maka ezerse funsaun iha munisípiu sira atu família sira hetan hela-fatin fatin dignu no di’ak durante ezerse funsaun iha fatin ida,” Ministru Prezidénsia Konsellu Ministru, Fidelis Manuel Leite Magalhães, relata, hafoin reuniuan ezekutivu, iha Palásiu Governu.

Notísia relevante: KM aprova planu rekrutamentu ba membru F-FDTL na’in 600

Portavóz Governu, argumenta, mekanizmu ne’e la’ós fó osan maibé iha postu sira ne’ebé membru instituisaun rua ezerse funsaun, instituisaun sira tenke garante kondisaun, ho ida-ne’e sei iha konstrusaun fatin ou aluga uma balun ne’ebé dignu ba membru  PNTL no F-FDTL sira ezerse funsaun ne’ebé la’ós sira-nia munisípiu.

Jornalista : Antónia Gusmão

Editora      : Julia Chatarina

iklan
iklan

Leave a Reply

iklan
error: Content is protected !!