EDUKASAUN, HEADLINE

MESSK konsidera UNTL presiza hadi’a jestaun tempu hodi labele hamosu problema

MESSK konsidera UNTL presiza hadi’a jestaun tempu hodi labele hamosu problema

Edifísiu sentrál Univesidade Nasionál Timor-Lorosa'e. Imajen Tatoli/Francisco Sony

DILI, 17 maiu 2022 (TATOLI)—Ministru Ensinu Superior Siénsia no Kultura (MESSK), Longuinhos dos Santos, husu ba jerente Universidade Nasionál Timor-Lorosa’e (UNTL) atu hadi’a jestaun tempu ho di’ak, nune’e la hamosu problema ba estudante sira durante prosesu aprendizajen.

“UNTL iha jestaun di’ak, maibé sira-nia pontu fraku maka utilizasaun jestaun tempu ba prosesu ensinu aprendizajen ne’e maka parese seidauk di’ak. Tanba ne’e, ha’u husu ba parte UNTL liuhosi Reitór atu hamutuk ho estrutura tomak atu jere ho di’ak liután sala aprendizajen ne’e atu estudante hotu bele uza,” Ministru informa iha salaun Delta nova, Comoro, tersa ne’e.

Notísia relevante: Estudante 350 hosi UNTL hetan bolsa estudu hosi FDCH

Governante ne’e hato’o lia hirak ne’e tanba antes ne’e estudante UNTL halo asaun protesta hasoru estrutura UNTL tanba fasilidade apoiu ensinu aprendizajen ba estudante iha sala aula limitadu.

“Ha’u rona estudante UNTL halo asaun protesta, ha’u kontaktu kedan ho dirijente universidade no sira informa mai ha’u katak hafoin mosu asaun protesta hosi estudante sira kona-ba menus fasilidade iha aula, parte universidade rezolve kedan ezijénsia estudante sira. Rona tiha ne’e, ha’u agradese ba universidade tanba bele buka hetan kedan konkluzaun hodi responde asaun protesta ne’e. Ha’u konsidera ne’e buat kiik, la’ós buat boot,” nia akresenta.

Tuir Ministru, asaun protesta ne’ebé estudante sira halo foka liu ba fasilidade no ekipamentu, liu-liu fasilidade atu apoiu prosesu ensinu aprendizajen iha aula hanesan projetór, espidol no kuadru mak laiha, tanba ne’e difikulta estudante no dosente atu hala’o prosesu aula prezensiál.

“Parte universidade buka ona solusaun no daudaun sira responde ona ezijénsia estudante sira. Enkuantu kona-ba fasilidade sala aula laiha problema tanba UNTL iha ona sala aula hamutuk 54, ne’ebé inaugura ona kompostu hosi fakuldade saúde iha sala 18, fakuldade ekonomia no jestaun sala 18 no edifísiu sentrál ba administrasaun iha sala 18,” Ministru tenik.

UNTL goza ona sira-nia autonomia administrativa no finanseira, ne’ebé prosesu tomak parte Governu entrega ba UNTL atubele rezolve.

Jornalista : Tomé Amado

Editora     : Julia Chatarina

iklan
iklan

Leave a Reply

iklan
error: Content is protected !!