BAUCAU, MUNISÍPIU, SOSIEDADE SIVĺL

Implementasaun podér lokál no desentralizasaun administrativa oportunidade ba emprezáriu lokál

Implementasaun podér lokál no desentralizasaun administrativa oportunidade ba emprezáriu lokál

Prezidente CCI-TL Munisípiu Baucau, Estanislao Maria Quintas da Costa. Imajen Tatoli/Natalino Belo.

BAUCAU, 18 maiu 2022 (TATOLI)–Kámara Komérsiu Indústria Timor-Leste (CCI-TL, sigla portugés) Munisípiu Baucau, konsidera implementasaun podér lokál no desentralizasaun administrativa loke oportunidade ba emprezáriu lokál kontribui ba dezenvolvimentu nasionál.

Prezidente CCI-TL Munisípiu Baucau, Estanislao Maria Quintas da Costa hateten, Baucau nu’udar zona ekonomia ba munisípiu tolu seluk iha parte leste hanesan Lautém, Viquque no Manatuto no iha poténsia iha área komérsiu nian.

“Bainhira impelementa duni lei podér lokál no desentralizasaun administrativa ne’e oportunidade di’ak ba ami emprezáriu atu hadi’a, prepara-aan tanba munisípiu Baucau poténsia ba ami emprezáriu atubele dezenvolve no kontribui ba dezenvolvementu,” Prezidente CCI-TL informa Agência Tatoli iha Vila Antiga, kuarta ne’e.

Nia dehan, setór importante ne’ebé presiza fó atensaun dahuluk mak hadi’a infraestrutru hanesan portu iha área Cairabela, postu Vemase ne’ebé durante ne’e abandona tanba bele fasilita prosesu distribusaun aktividade ekonomia hanesan importantasaun no esportasaun iha área leste no sei fó impktu ba presu iha merkadu tanba minimiza ona kustu kombustível.

“Bainhira portu funsiona kustu operasaun sei redús nune’e folin sasán to’o iha konsumedór sira sei baratu,” Estanislao argumenta.

Nune’e mós autoridade munisipál presiza investe iha setór turismu lokál, turismu kulturál, turizmu istóriku no turismu relijiozu ne’ebé sei kontribui ba rendimentu ekonomia iha Baucau.

Nia husu investe iha setór agrikultura tanba sei hasa’e rendimentu ekonomia povu direitamente no seluk atividade negósiu ein-jerál.

Nune’e, CCI-TL Baucau konsidera lei númeru 23/2021, loron 10 novembru kona-ba podér lokál no desentralizaun administrativa inportante tanba munisípiu iha kompeténsia foti desizaun admistrativa liuhosi Prezidente Autoridade Munisipál hodi halo planu kona-ba dezenvolve Baucau iha futuru.

Enkuantu lei númeru 22/2021, loron 4 novembru kona-ba eleitóral munisipál importante tanba durante ne’e lideransa sira munisípiu nian sempre deside hosi Governu Sentrál nune’e la tuir povu-nia hakarak tanba ne’e bainhira lei eleitorál munisipál realiza povu mak sei determina ninia lideransa rasik.

Estanislao hateten, Baucau oan hotu-hotu bele kandidata aan ba Prezidente Autoridade maibé importante tenke iha inisiativa, hatene halibur, akumula, organiza no rona aspirasaun hosi entidade tomak nune’e bele lori dezenvolvementu ba povu iha Baucau.

“Baucau ona matenek barak, inportante hatene akumula labele haree ba grupu, kór partidu, bainhira sai aman ba Baucau oinsá mak bele dezenvolve Baucau ba mudansa,” Estanislao enkoraja.

Notísia relevante: Governu Sentrál presiza aselera implementasaun podér lokál no dezentralizasaun administrativa

Jornalista    : Natalino Belo

Editór           : Evaristo Soares Martins

iklan
iklan

Leave a Reply

iklan
error: Content is protected !!