MANATUTO, 20 maiu 2022 (TATOLI)-Sekretáriu Estadu Juventude no Desportu (SEJD), Abrão Saldanha, komemora loron restaurasaun independénsia ba dala-20 ho populasaun sira iha Suku Ailili, Postu administrativu Manatuto vila, Munisípiu Manatuto
Governante ne’e hateten, iha buat barak mak Timor–Leste seidauk atinji iha ukun rasik an ida ne’e, tanba ne’e Governu no Estadu kontinua fó-importánsia ba ema hotu-hotu liuliu joven sira hodi kontribui pás no estabilidade hodi bele fó-biban ba líder no ukun-na’in sira hodi dezenvolve rai ida ne’e ba povu nia moris di’ak iha futuru.
“Ita tenke hamutuk hateke ba oin ho objetivu jerál ida katak povu no foinsa’e sira tenke serbisu hamutuk hodi dezenvolve Timor- Leste ba futuru maski ita iha diferensa polítika no diferensa organizasaun,’’ nia fó-hanoin, iha ámbitu komemora loron restaurasaun independénsia 20 maiu, ba Tatoli, iha sesta ne’e.
Sekretáriu Estadu juventude no desportu, Abrão Saldanha haklaken ba povu Timor-Leste tomak espesialmente foinsa’e sira katak ohin ita bele komemora loron restaurasun independénsia ba dala-XX tanba mehi husi joven sira nian ne’ebé mak luta maka’as iha prosesu luta ba ukun rasik an, tanba ne’e husu ba foinsa’e sira hodi hatutan mehi ba moris di’ak liuhosi serbisu ne’ebé disiplina hodi alkansa moris di’ak iha futuru.
“Ha’u fiar katak liuhosi foinsa’e sira-nia mehi, tinan 10 ka 20 oin mai Timor–Leste bele gaña moris di’ak iha futuru maibé atu konkretiza mehi ida ne,e, husu ba entidade hotu-hotu no populasaun Timor–Leste tomak hodi serbisu maka’as,’’ nia apela.
Membru Governu ne’e esplika, importánsia husi komemorasaun loron 20 maiu ne’e hodi hanoin hikas funu-na’in no martir sira-nia mehi hodi kontinua valoriza no tane as prinsípiu fundamentál ba harii Timor–Leste.
“Nu’udar sidadaun ne’ebé di’ak ita hotu iha direitu sívil polítika hodi deside futuru rai ida ne’e nian liuhosi mehi hodi hatutan obra ne’ebé ita nia funu-na’in sira husik hela mai ita,’’ ezekutivu ne’e akresenta.
Entretantu, komemorasaun loron restaurassun independénsia ba dala-20 ne’e, asegura husi Polísia Nasionál Timor–Leste (PNTL) no partisipa másimu husi funsionáriu tomak, estudante sira, membru arte marsiál sira hanesan Kera Sakti, KORK, PSHT, Perisai Diri (PD), Taekwondo no povu Manatuto enjerál.
Inspetór ba serimónia importante ne’e mak SEJD, Abrão Saldanha.
Jornalista : Camilio de Sousa
Editór: Rafy Belo
