QATAR, 21 maiu 2022 (TATOLI)– Selesaun nasionál U-23 ne’ebé lideradu hosi Treinadór Fabio Maciel da Silva, sesta ne’e, hahú hala’o treinamentu dahuluk iha kampu futebol iha Qatar University hodi aumenta jogadór sira nia koinesimentu no kapasidade jogu.
“Iha ne’e fatin treinamentu ne’ebé prepara ba nasaun hotu iha mundu, sei mai halo treinamentu iha ne’e atu joga iha kopa mundial ne’ebé sei realiza iha tinan ne’e, fatin ne’ebé ho fasilidade kompletu, duut sira di’ak tebes, entaun ita nia jogadór sira tenke aproveita kedan oportunidade ne’e hodi halo treinamentu,” Fabio hateten ba Agência TATOLI hafoin treinamentu iha Qatar.
Treinamentu loron dahuluk nian hanesan faze rekuperasaun atu halo jogadór sira bele iha adaptasaun di’ak atu halao treinamentu iha ne’e ho susesu.
“Durante loron 12 ou 11 ita iha ne’e ha’u fiar jogadór sira sei treinu ho di’ak hodi hasa’e sira nia koinesimentu iha fatin kualidade hanesan ne’e,” nia garante.
Tanba, iha futeból jogadór presiza kondisaun hanesan agora daudaun halo, treinamentu iha fatin ne’ebé di’ak, ai-han ba jogadór sira tenke di’ak, estrutura jogadór nian di’ak ne’e mak faze baziku ba jogadór futeból.
“Kondisaun sira hanesan ne’e mak ha’u mehi ba futuru Timor – Leste tenke iha kampu futeból ne’ebé di’ak, iha fatin fiksu ne’ebé tau jogadór sira nonook iha fatin ida tanba atu hasa’e kualidade jogadór nian, ida ne’e mak ha’u nia mehi atu hasae jogadór sira nia talentu di’ak liu tan,” nia relata.
Daudaun ne’e jogadór hamutuk na’in-21 mak hala’o hela treinamentu iha Qatar, hosi númeru ne’e kompostu hosi Guarda Rede na’in-rua no jogadór defeza, mediu no avansadu hamutuk na’in-19.
Treinadór ne’e hatutan, iha nasaun Qatar fatin ne’ebé selesaun nasional hosi nasaun tomak hakarak mai halo treinamentu maibé dala barak laiha oportunidade, tanba ne’e nia husu ba jogadór sira atu utiliza oportunidade ne’e hala’o treinu ho seriu atu aumenta esperiensia iha kareira.
Notisia relevante: Derrota iha SEA Games, Selesaun nasionál U-23 arranka ba Qatar halo jogu amigavél
Jornalista: Hortencio Sanchez
Editór : Florencio Miranda Ximenes
