DILI, 21 maiu 2022 (TATOLI)—Diretór Organizasaun Naun Governmentál (ONG) Saúde Ba Ema Hotu (SABEH), Andre Belo hateten, iha tinan 20 Timor-Leste ukun an ne’e Ministériu Saúde tenke mellora infraestrutura bázika iha 13 munisípiu, atu nune’e ema hotu bele asesu saúde ho dignu.
“Ha’u dehan presiza tebes mellora infraestrutura bazika sira tanba 50% postu saúde iha Timor laran tomak kama partus kondisaun ladi’ak hotu,” Diretór SABEH, Andre Belo, hateten ba TATOLI iha aldeia 30 Agostu, suku Comoro, Postu Administrativu Don Aleixo, munisípiu Dili, sábadu ne’e.
Nia dehan, sasán bázika hanesan ba iha sirurjia sira-ne’e barak mak laiha inklui ai-moruk sira, entaun Ministériu Saúde tenke hadi’a sistema distribuisaun hosi nasoinál ba munisípiu ba iha sentru saúde depois ba postu saúde.
“Agora ita la’ós laiha ai-moruk maibé ita iha aimoruk barak. Presiza mak tenke hadi’a sistema lojístika no jetsaun para oinsá komunidade sira iha área rurál liu-liu postu saúde sira labele falta sasán bázika entermu servisu saúde nian,” nia dehan.
Timor Leste ukun an tinan 20 ona no profisionál saúde sira barak atu apoiu servisu atendimentu saúde ba komunidade tanba rekursu umanu sufisiente.
“Fila-fali ba entidade sira iha rekursu umanu Ministériu Saúde para atu jere tanba ita la problema ho rekursu umanu maibé ita problema ho ema sira-ne’ebé mak jere rekursu umanu. Entaun, ita tenke jere rekursu umanu ho didi’ak para bele to’o ba iha postu saúde sira atu halo atendimentu ba komunidade sira iha área rurál,” nia esplika.
Médiku Andre Belo hateten, servisu saúde la’ós Ministériu Saúde nian no saúde la’ós pesoál ida-nian mesak maibé saúde ne’e servisu ida-ne’ebé mak interligadu, tanba saúde ne’e servisu ho instituisaun ho ajénsia ho ema hotu-hotu.
“Ita-nia Governu durante ne’e esforsu másimu atu lori saúde ne’e ba komunidade sira hotu iha área hotu-hotu. Tanba, Governu kria ona postu saúde hamutuk 332 iha teritoriu naisonál maibé hosi numeru ne’e, iha postu saúde 100-resin mak foin destaka pesoál saúde no restu ida-ne’e sei mamuk hela,” nia dehan.
Problema boot iha Ministériu Saúde mak rekursu umanu, tan ne’e postu saúde barak mak sei mamuk no sei abandona hela no barak mak servisu iha fatin ida ba fali fatin seluk laiha informasaun no komunidade mak to’o agora seidauk asesu ba iha postu saúde.
“Agora ita la’ós dehan rekursu laiha ita rekursu iha maibé ita presiza de’it ema iha koñesimentu atu jere ita-nia rekursu ida-ne’e. Ha’u dehan hanesan ne’e tanba informasaun no servisu ne’ebé mak di’ak mak Ministériu Saúde tenke servisu ema hotu konsidera no tenke halo mapeamentu ba ita-nia forsa para bele hatene ita-nia servisu to’o ne’ebé atu kompleta ita-nia misaun,” nia sujere.
Notísia Relevante: SABEH koopera Timor Awakening kapasita voluntáriu-sira lori saúde ba komunidade
Jornalista : Felicidade Ximenes
Editór : Cancio Ximenes
