COVALIMA, 23 maiu 2022 (TATOLI)–Sekretariu Jerál Partidu CNRT iha Covalima, Alberto Moníz de Araújo, husu Parlamentu Nasionál halo diskusaun no aprova lalais proposta-lei finansa munisipál, nune’e bainhira implementa lei podér lokál no dezentralizasaun administrativa karik labele fó impaktu.
Notisia Relevante: MAE revee hela Proposta-lei finansa munisipál
“Ami hosi kuadru partidu CNRT ezije ba Parlamentu Nasionál tuur hamutuk hodi hahú diskute ona proposta-lei finansa públika, hodi hamosu lei finansa lokál nune’e atu implementa lei podér lokál no dezentralizasaun administrativa karik, ita laiha difikuldade hodi simu knar boot rua ne’ebé mak atu implementa iha munisípiu,” Sekretáriu Jerál partidu CNRT munisípiu Covalima, Alberto Moniz de Araújo, informa ba Agencia Tatoli iha Kampu Ladi, segunda ne’e.
Ho nune’e, bainhira Parlamentu Nasionál seidauk aprova proposta-lei lei finansa munisipál ida ne’e fó impaktu no obstakulu boot atu implementa lei podér lokál no dezentralizasaun administrativa.
“Ami hosi partidu CNRT nia haree bainhira Parlamentu Nasionál (PN) seidauk aprova lei finansa munisipál, loos, ida-ne’e fó impaktu no obstakulu boot ida atu implementa lei podér lokál no dezentralizasaun administrative,” nia hateten.
Tanba, tuir nia, atu realiza eleisaun Kámara Munisípiu no eleisaun asembleia munisípal atu halo planu no programa tenke bazea ba orsamentu no programa bazea ba atividade, la’ós prevee orsamentu laiha planu no atividade.
“Temi eleisaun kámara munisípiu no eleisaun asembleia munisipál, ita atu halo planu programa sira-ne’e, bazea ba orsamentu ne’ebé adekuadu hodi bele tau iha programa. Programa bazea ba atividade la’ós ita tau orsamentu laiha planu no atividade oinsá mak ita bele realiza eleisaun rua,” nia dehan.
Partidu CNRT nia rekursu preparadu no prontu atu implementa lei podér lokál no dezentralizasaun administrativa hafoin hasoru eleisaun parlamentár no atu hasoru eleisaun kámara munisípiu no asembleia munisipál.
“Atu implementa lei podér lokál no dezentralizasuan administrativa ami Partidu CNRT iha munisípiu Covalima prontu atu hasoru eleisaun ne’e, hafoin eleisaun parlamentár impelementa eleisaun rua ne’ebé mak ha’u mensiona ne’e,” nia hateten.
Tuir nia, lei podér lokál mak hanesan Governu sentrál fó ona kompeténsia ba munisipiu atu haree rasik no ukun rasik nia Munisípiu, bolu programa hakbesik ba povu autonomia ba nia munisípiu.
Aleinde ne’e, dezentralizasaun administrativa hanesan fó kompeténsia ba munisípiu atu ukun haree nia uma-kain iha munisípiu ligadu líder lokál rasik mak hili hanesan prezidente kámara munisípiu ho nia asembleia munisipál.
Maibé, atu implementa lei podér lokál no desentralizasaun administrativa garantia atu susesu parte botu tenke servisu hamutuk, maske diferensa partidu politíku nu’udar Covalima oan tenke fó liman ba malu atu lori dezenvolvimentu ba oin.
Vise Koordenadór partidu FRETILIN munisípiu Covalima, Abrão Nascimento, hateten maske prezidente repúblika promulga ona lei podór lokál no dezentralizasuan administrativa maibé Parlamentu nasionál seidauk aprova proposta-lei finansa munisipál fó impkatu, tanba kona-ba orsamentu, munisípal nafatin sentraliza iha nasionál.
Partidu FRETILIN sujere ba Governu sentrál haree mós proposta-lei finansa hodi fó direitamente ba iha munisípiu nune’e bele halo planu no programa tuir nesesidade bainhira orsamentu sentraliza nafatin iha nasionál fó impaktu, atu halo dezenvolvimentu iha munisipiu rasik.
Atu implementa lei podér lokál no dezentralizasaun administrative, munisípiu Covalima preparadu ona hein simu dezisaun hosi Governu sentral.
“Agora daudaun munisípiu Covalima bele hateten katak ita preparadu atu implementa lei podér lokál no desentralizasaun administrativu tanba rekursu umanu no balun ita sei haree hamutuk oinsá mak implementa lei poder lokál,” nia dehan.
Tuir nia, Lei podér lokál mak hanesan, programa mai hosi munisípiu covalima hahú suku sira postu to’o munisípiu hafoin ba iha nivél nasionál. Aleinde ne’e dezentralizasaun administrativa mak hanesan entrega podér ba munisípiu rasik oinsá atu jere nia rekursu iha munisípiu.
Partidu FRETILIN nia rekursu iha covalima preparadu no prontu atu implementa lei podér lokál no dezentralizasaun administrativa no implementa kualker programa hodi haree ba orsamentu rasik.
Ho nune’e, atu implementa lei podér lokál no desentralizasaun administrativa garantia atu susesu parte hotu tenke servisu hamutuk maske iha diferensa politíka maibé hanesan Covalima oan hodi lori dezenvolvimentu ba oin.
“Ita garantia implementa lei podér lokál no desentralizasaun administrativa ho susesu, ita hotu tenke hamutuk liu-liu ba partidu politiku sira, maske ita iha diferensa politika, hanesan Covalima-oan ita hamutuk hodi dezenvolve munisípiu ba oin,” nia dehan.
Notísia Relevante: PN aprova projetu Lei Eleitorál Munisipál-Podér Lokál iha finál globál
Jornalista : Celestina Teles
Editór : Cancio Ximenes
