HEADLINE, IMAJEN, MUNISÍPIU, OÉ-CUSSE (RAEOA), SAÚDE

Saúde RAEOA distribui muskateiru ba komunidade prevene moras malaria

Saúde RAEOA distribui muskateiru ba komunidade prevene moras malaria

Saúde Oé-Cusse distribusi muskiteiru ba komunidade prevene moras malária. Imajen Tatoli/Abílio Elo Nini.

OÉ-CUSSE, 23 maiu 2022 (TATOLI) – Servisu Saúde Rejiaun Administrativa Espesiál Oé-Cusse Ambeno (RAEOA), segunda ne’e hahú distribui muskiteiru ba komunidade sira iha bairru Numbei, suku Costa, sub-rejiaun Pante Makasar, hodi komemora loron mundiál moras malária iha 26 maiu tinan ne’e, nune’e bele kombate moras malária iha rejiaun ne’e.

Diretora Servisu Saúde RAEOA, Lolita Lay dos Santos, esplika, iha tinan ne’e ekipa malária hosi nasionál sei hamutuk ho servisu saúde RAEOA komemora loron mundiál moras malária, ne’ebé sei realiza iha 26 maiu, nune’e atividade prinsipál mak fahe muskiteiru ba komunidade no realiza limpeja jerál iha suku Bene-Ufe, sub-rejiaun Nítibe.

“Objetivu atividade rua-ne’e, atu enkoraja komunidade uza muskiteiru no halo limpeza iha ambiente ne’ebé besik uma, atu evita susuk atu prevene moras malária, tanba iha 2020 Oé-Cusse rejista kazu malária hamutuk 11 maioria iha suku Bene-Ufe, Naktuka, entaun ita-nia eliminisaun moras malária seidauk bele realiza, tán ne’e maka tinan ne’e hosi nasionál mai realiza selebrasaun loron mundiál malária iha O’e-Cusse,” Lolita Lay dos Santos, informa ba Agência Tatoli iha Oé-Cusse.

Nia informa, iha 2021 mai to’o 2022 sservisu saúde RAEOA seidauk rejista kazu foun, maibé identifika de’it fatin sira-ne’ebé risku ba moras malária hanesan iha suku Bene-Ufe, hodi serbisu hamutuk ho autoridade komunitária mobiliza komunidade sira hala’o limpeza jerál.

“Maibé ba muskiteiru, ne’e fahe jerál, agora iha suku Costa, aldeia Sanane sei kontinua ba aldeia seluk no suku sira seluk iha perténsia Pante Makasar, nomoos sei kobre hotu sub-rejiaun Oésilo Pássabe no Nítibe,” nia katak.

Xefe bairru Numbei, Lorenço Liu, hatete, antes ne’e rekolla ona dadus, no informa kedaS ba kada família atu iha koñesimentu tanba apoia ne’e laiha intensaun ho polítika nian, maibé polÍtika Governu apoia komunidade atu prevene-aan hosi moras malária.

“Orgullu tanba Governu fahe muskiteiru ba komunidade, atu uza bainhira toba bele salva-aan hosi susuk, ida-ne’e apoia no enkoraja komunidade sira atu oinsá bele prevene ka hadook-aan hosi moras malária no moras seluk, tanba bainhira ita uza muskiteiru ita bele salva ita-nia isin susuk labale tata,” nia katak.

Jornalista     : Abílio Elo Nini
Editór             : Evaristo Soares Martins

iklan
iklan

Leave a Reply

iklan
error: Content is protected !!