EKONOMIA, HEADLINE, IMAJEN, MUNISÍPIU, OÉ-CUSSE (RAEOA), SOSIEDADE SIVĺL

Grupu Kafé Lakufoan Oé-Cusse hetan rendimentu di’ak iha feira produtu lokál

Grupu Kafé Lakufoan Oé-Cusse hetan rendimentu di’ak iha feira produtu lokál

Grupu kooperativa Kafe Lakufoan Oé-Cusse hetan rendimentu di'k iha feira produtu lokàl. Imajen Tatoli/Abílio Elo Nini.

OÉ-CUSSE, 24 maiu 2022 (TATOLI) – Grupu Kooperativa Kafé Lakufoan, hosi suku Costa, sub-rejiaun Pante Makasar hetan rendimentu di’ak liuhosi atividade négosiu fa’an kafé iha feira produtu lokál ne’ebé realiza iha Rejiaun Administrativa Espesiál Oé-Cusse Ambeno (RAEOA).

Koordenadora Kooperativa Kafé Lakufoan, Anita Eko, informa, kada tinan autoridade realiza feira produtu lokál, kooperativa kafé Lakufoan, mós hola parte atu hatudu produtu kafé ne’ebé prodús hosi to’os na’in sira iha aldeia Lakufoan.

Ho presu maka hanesan, kopu ida sentavu $0,50, kafé uut ida $1,75, 250 grama sentavu $2,50, 500 grama $3,50, kilograma ida $6,00.

“Komesa abertura feira bazar kalan ne’e iha domingu 15 to’o ohin 24 maiu, hetan sorti di’ak tanba ami-nia produtu kafé ema hola barak, maioria mai hemu de’it iha tempu kalan nian,” Anita Eko, informa ba Agência Tatoli iha Palaban, Oé-Cusse, tersa ne’e

Nia informa, kalan ida bele hetan to’o $30,00 dolar, barak mak tama persiza hemu de’it, nune’e rezultadu rendimentu durante kalan sia nia laran hamutuk $300-resin ona.

Nia akresenta, osan ne’ebé hetan liuhosi atividade négosiu ne’e, osan sei hatama hotu ba kooperativa, nu’udar fundu hodi uza ba reimbolsa.

“Osan ne’e ami sei tau hamutuk iha kooperativa uza ba reimbolsa, fó oportunidade ba membru sira de’it mak bele asesu kréditu no hatama fali osan fundu ho nia funan,” nia katak.

Grupu kooperativa kafé Lakufoan, ho inisiativa harii grupu ida iha Leolbatan, no hetan apoia tékniku no fasilidade mai hosi UNDP no Autoridade RAEOA liuhosi Sekretáriu Rejionál Asuntu Komérsiu no Indústri, fasilita to’os na’in-sira oinsá kuda kafé to’o rezultadu produsaun.

“Ami-nia grupu kooperativa ne’e hamutuk na’in-36, to’os ba kafé mós 36, servisu ekipa, ami harii primeiru iha 2006, tanba hetan apoia fini no tékniku hosi UNDP no autoridade to’o 2011 iha rezultadu no ami hahú kedan asesu ba merkadu, distribui iha Oé-Cusse to’o Díli, no balu fa’an iha kooperativa,” nia katak.

Nia informa, membru hamutuk na’in-36, idak-idak oferese nia kintál sai to’os públiku kuda kafé, no serbisu mak hamutuk hanesan halo lutu, no halo terras, maibé nia rezultadu hotu hatama ba kooperativa.

Anita Eko, informa obstákulu durante ne’e kooperativa Kafé Lakufoan enfrenta iha inísiu mak fasilidade produsaun, tanba primeiru seidauk hetan apoia halo produsaun ba rezultadu, maibé ho konsiénsia grupu ne’e ho inisiativa, halo produsaun ho sistema manuál de’it.

Maibé to’o tinan kotuk hetan ona apoia hosi UNDP fornese fasilidade, hanesan mákina dulas kafé kór-mean, mutin no mákina sona kafé nian, no tasu boot tolu inklui fasilidade seluk kona-ba bee-moos nian, nomoos komputadór no surat tahan uza ba kooperativa,” nia informa.

Jornalista       : Abílio Elo Nini
Editór             : Evaristo Soares Martins

iklan
iklan

Leave a Reply

iklan
error: Content is protected !!