DILI, 27 maiu 2022 (TATOLI)—Komisaun Nasionál Aprovizionamentu (CNA, sigla portugés) loke ona prosesu konkursu ba projetu konstrusaun estrada liga ba postu administrativu Laga bá Baguia, Uaiaca ba Quelicai, munisípiu Baucau, inklui parte hosi postu administrativu Ossu, munisípiu Viqueque.
Tuir nota ne’ebé Agência Tatoli asesu sesta ne’e, CNA loke konkursu públiku ba projetu estrada munisipál Uai-aca Quelicai no Ossu iha loron 24 maiu no ba projetu estrada munisipál Laga bá Baguia iha loron 27 maiu 2022.
Antes ne’e, CNA públika projetu munisipál rua ne’e hafoin hetan aprovasaun iha Konsellu Administrasaun Fundu Infraestrutura (KAFI) iha loron 06 maiu 2022, ne’ebé antes ne’e Ministru Obra Públika (MOP), Abel Pires da Silva, aprezenta ona ba Konsellu Ministru (KM) no hetan ona aprovasaun atu loke prosesu konkursu públiku internasionál ba projetu rua ne’e.
Notísia relevante: Governu prevee millaun $22 reabilita estrada Laga-Baguia
Tanba ne’e, CNA konsege publika ona konkursu públiku no bainhira hetan ona manán-na’in iha prosesu mak Governu liuhosi Ministériu Obra Públika (MOP) sei implementa tuir kontratu ne’ebé iha.
Daudaun ne’e, Ministru Obra Públika no Vise-Ministru Obra Públika, Nicolau Lino Freitas Belo, hamutuk ho dirijente no tékniku sira kontinua serbisu maka’as hodi halo koordenasaun ba implementasaun projetu infraestrutura sira.
Jornalista : Arminda Fonseca
Editora : Julia Chatarina
