DILI, 27 maiu 2022 (TATOLI)–Ministériu Edukasaun Juventude no Desportu (MEJD) aumenta ona orsamentu merenda eskolár hosi $0,25 ba $0,42 kada estudante, ba totál estudante ensinu báziku hamutuk 251.000 iha territóriu tomak.
Ministru Edukasaun Juventude no Desportu, Armindo Maia, hateten, programa merenda eskolár hodi garante nutrisaun di’ak ba labarik sira iha prosesu ensinu aprendizajen.
“Ami-nia kalkulasaun tanba durante tinan barak osan ba merenda eskolár ne’e la aumenta hela de’it. Tanba ne’e maka ami deside hasa’e ba $0,42, nune’e karik tinan oin mai mak sasán folin sa’e tan mak Nai Deputadu sira hakarak hasa’e tan folin merenda eskolár, ne’e di’ak liután,” Ministru dehan iha Parlamentu Nasionál (PN), sesta ne’e.
Notísia relevante: Programa merenda eskolár deskonsentra ona ba munisípiu sira
Governante ne’e nota katak, bainhira Governu prevee orsamentu merenda eskolár atu apoiu nutrisaun di’ak ba estudante ensinu báziku sira, iha Deputadu balun maka hamosu preokupasaun.
“Sira husu esplikasaun tanba sá mak ministériu hakarak aumenta osan ba merenda eskolár, bazeia ba sasukat saida, keta ministériu inventa de’it karik,” nia haktuir.
Ba kestaun ne’e, Ministru esplika, aumenta osan merenda eskolár ba estudnate sira ne’e ho razaun tanba tuir situasaun tanba daudaun sasán nia folin sa’e maka’as.
“Daudaun manutolun ida de’it $025, kuandu sosa barak maka nia folin tuun parese $0,20. Tanba ne’e, ministériu deside hasa’e folin merenda eskolár ba $0,42 ba kada estudante, ne sufisiente ona. Kuandu haree ba ninia pursentu, subida ida hosi $0,25 ba $0,42 ekivalente ona ba subida ida 84%,” nia dehan.
Antes ne’e, Governu prevee orsamentu millaun $12,550 ba programa merenda eskolár, maibé bainhira hasa’e montante ba $0,42 ba kada estudante 251.000, maka kustu sa’e ba millaun $21,084.
Jornalista : Tomé Amado
Editora : Julia Chatarina
