BAUCAU, HEADLINE, MUNISÍPIU, SAÚDE

MAKLN apoia orsamentu rihun $30 ba klínika veteranu David Alex

MAKLN apoia orsamentu rihun $30 ba klínika veteranu David Alex

Sekretáriu Jerál CMCLN Baucau, Manuel Alari da Costa Soares. Imajen Tatoli/Natalino Belo.

BAUCAU, 30 maiu 2022 (TATOLI) – Ministériu ba Asuntu Kombatente Libertasaun Nasionál (MAKLN) apoia orsamentu $30.000 hodi sosa ekipamentu nune’e fasilita atendimentu pasiente iha klínika veteranu David Alex ‘Daitula’ iha munisípiu Baucau.

Sekretáriu Jerál Konsellu Munisipál Kombatente Libertasaun Nasionál Baucau, Manuel ‘Alari’ da Costa Soares, agradese ba governu tanba responde ona proposta ne’ebé konsellu veteranu Baucau propoin.

“Ami halo pedidu atu ministériu ajuda, tanba-ne’e entrega hotu ona, ami hein katak ba oin sei di’ak liután tanba iha ona orsamentu kada fulan halo atendementu ho di’ak,” Sekretáriu Jerál CMCLN Baucau hateten iha Vila Antiga, segunda ne’e.

Nia dehan, ho apoia orsamentu ne’e bele fasilita klínika tanba durante ne’e enfrenta difikuldade, bele responde ona funsionáriu no pasiente veteranu ne’ebé halo tratamentu iha sentru klínika David Alex ‘Daitula’ Baucau.

Konsellu veteranu iha tempu badak sei halo tán proposta ba Ministeiru Saúde atu apoia tán rekursu umanu hanesan doutór interna, fisioterapia no espesialista fuan.

Iha proposta refere sei previstu mós bolsa estudu ba médiku sira atu hetan estudu iha área espesialista nune’e futuru bele serbisu profisionál liután no responde ba difikuldade ne’ebé klínika refere hasoru.

Koordendór Sentru Klínika Veteranu Baucau, Leonel Guterres, hateten, ekipamentu ne’ebé apoia provizoriumente sufisiente atu halo atendimentu ba pasiente sira-ne’ebé halo tratamentu iha klínika veteranu Baucau.

“Ita foin la’o fulan-haat, utuliza de’it ekipamentu privadu hanesan laptop tanba inísiu ekipamentu ladún sufiseinte,” Leonel hateten.

Fasilidade iha sentru klínika veteranu Baucau fahe ba rua hanesan ekipamentu tékniku ka instrumentu médiku ne’ebé ligadu ho atendimentu pasiente no administrasaun nian hanesan mákina eletrónika, surat tahan no tinta.

MAKLN aprova orsamentu hamutuk $30.000 hodi sosa ekipamentu sira hanesan motorizada ida, komputadór rua, laptop ida, rádiu komunikasaun lima, mákina printer ida, uniforme ba funsionáriu inklui osan ba tinan-ida no osan apoia ba sosa ai-moruk.

Jornalista    : Natalino Belo

Editór           : Evaristo Soares Martins

iklan
iklan

Leave a Reply

iklan
error: Content is protected !!