VIQUEQUE, 30 maiu 2022 (TATOLI)—Ospitál internamentu munisípiu Viqueque halo ona transferénsia pasiente Afonso Gomes ho idade 74, hanesan aman hosi saudozu Sebastião Gomes mai Ospitál Nasionál Guido Valadares (HNGV, sigla portugés), tanba sofre pulmaun no fuan.
“Nia mai halo tratamentu durante loron-tolu tanba sofre pulmaun no fuan, sei kontinua halo tratamentu iha HNGV”, Doutora Internamentu, Mónica Maria, hateten ba Agência Tatoli iha internamentu Viqueque, segunda ne’e.
Tuir Monica, saudozo ninia aman iha moras seluk, antes ne’e iha tuberculosis (TBC) komulár maibé halo tratamentu durante fulan-ualu.
“Ami haree daudaun ne’e nia kondiasaun jerál sei iha iis boot no mear, ne’ebé ami fó tratamentu antibiótiku durante loron-tolu, maibé sei nafatin moras. Ami iha ne’e ai-moruk limitadu. Tanba ne’e, ami haruka bá HNGV hodi doutór espesialista sira bele fó tratamentu kontinuasaun ba saudozu Sebastião nia aman”, nia akresenta.
Notísia relevante: Gregorio Saldanha husu Governu apoiu saudozu Sebastião Gomes nia inan-aman
Nune’e, doutór sira prepara ona karta hodi transporta Saudozo Sebastião Gomes nia aman ba HNGV hodi halo tratamentu.
Iha biban hanesan, pasiente Afonso Gomes, sente hela iis boot, oin nakukun no kotuk laran moras, ne’ebé sai hosi uma Uaimori mai baixa iha internamentu iha loron sesta 27 maiu, maizumenus tuku 18:00 lorokraik no kuaze loron-tolu baixa, maibé sei kontinua moras, tanba ne’e kontinua halo tratamentu iha ospitál nasionál.
“Doutór sira halo ona karta hodi ha’u bá kontinua halo tratamentu iha nasionál. Ha’u moras kleur ona tanba uluk militar sira baku no tebe ha’u, ne’ebé ha’u tuir tiha programa durante fulan-ualu ba moras uluk”, saudozo nia aman konta tuir.
Iha fatin ketak, Segundu-Vise Komité 12 Novembru rejiaun ponte leste, Emídio Amaral, informa, saudozu Sebastião Gomes nia aman, Afonso Gomes hanesan veteranu ordem Nicolau Lobato.
“Agora nia moras, tanba ne’e ohin ha’u ba haree. Ohin ha’u ba vizita nia tanba nia kontinua halo tratamentu iha HNGV. Ha’u informa ba Komité 12 Novembru hodi haree saudozu nia aman durante halo tratamentu iha Dili. Ha’u husu Ministériu Saúde atu fó tratamentu di’ak ba saudozu nia aman,” nia hameno.
Tuir Emídio Amaral, saudozo Sebestião Gomes nia aman hanesan patrimóniu Estadu ne’ebé oferese ninia-án no oan mate iha 28 outubru 1991 hodi hamosu manifestasaun boot no akontese Masakre Santa Cruz iha 12 novembru 1991.
“Ita tenki haree saudozu nia aman ho di’ak. Se bele buka nasaun sira ne’ebé ospitál di’ak hodi fó tratamentu ba saudozu nia aman”, nia hato’o.
Saudozu Sebastião Gomes nia aman desloka ona segunda ne’e ba HNGV hodi kontinua hetan tratamentu ba nia moras.
Jornalista : Vitorino Lopes da Costa
Editora : Julia Chatarina
