DILI, 30 maiu 2022 (TATOLI)—Uma-kreda katólika Timor-Leste agradese ba Papa Francisco ne’ebé nomeia ona Arsebispu Arkedioseze Metropolitana Dili, Don Virgílio do Carmo da Silva, sai kardeál dahuluk iha Timor-Leste.
“Arkidioseze Metropolitana Dili hakarak komunika ba Padre, Religiozu, Religioza no sarani sira hotu iha Timor-Leste laran tomak katak, ita kreda Timór agradese wa’in tebes ba Maromak, ba grasa boot ne’ebé kreda Timór simu hosi liuhosi eskollamentu Amu Papa Francisco ba ita-nia Don Virgílio do Carmo da Silva, nu’udar kardeál foun ba igreja universál no kardeál dahuluk ba kreda Timór,” Chanceler Arkidioseze Dili, Padre Paulus Maya, hateten, iha Kámara Ekleziástiku, Lecidere, segunda ne’e.
Notísia relevante: Don Virgílio do Carmo da Silva, Kardeál dahuluk Uma Kreda Timor-Leste
Amu Papa Francisco iha Vatikanu nomeia iha loron domingu, 29 maiu 2022 iha solenidade Ascenção do Senhor.
“Grasa boot ida-ne’e nu’udar sinál katak Maromak besik tebes ba ita no hadomi tebes povu Timór, ba fidelidade tinan-500 moris nu’udar sarani no nu’udar povu ida no rai ida ne’ebé hanaran-an Terra de Santa Cruz e Terra de Santa Maria,” nia dehan.
Ho ida-ne’e nia husu ba sarani katólika nu’udar fiar na’in no nu’udar igreja, agradese ba Maromak ba grasa boot ne’e.
“Husu ita hotu tau-matan didi’ak ba grasa ida-ne’e iha ita-nia moris loron-loron ho ita-nia fidelidade ba Maromak. Ha’u sei hamutuk ho imi to’o mundu nia rohan (Mateus 28:20),” nia akresenta.
Don Virgílio moris iha loron 27 novembru 1967, iha Venilale, Timor-Leste, hala’o ninia estudu dahuluk iha eskola primária to’o sekundária iha eskola saleziana iha Fatumaca, hafoin nia kontinua ninia formasaun iha kongregasaun saleziana no halo ninia profisaun dahuluk iha loron 31 Maiu 1990 iha Komunidade Saleziana Fatumaca.
Halo ninia profisaun dahuluk, Mons. Virgílio hala’o ninia estudu filozófiku no teolójiku iha Manila, Filipina no durante ninia estudu iha Filipina, Mons. Virgílio halo ninia profisaun perpétua iha loron 19 marsu 1997.
Nia simu ordenasaun prezbiterál iha loron 18 dezembru 1998 iha Santuário Nacional de Maria Auxiliadora dos Cristãos Parañaque, Filipina, hafoin ramata ninia estudu teolójiku nian iha Don Bosco School of Theology (BDST) ne’ebé uluk hanaran Don Bosco Center of studies (DBCS).
Hosi tinan 1999 to’o 2002, nia tau-matan ba aspirante sira iha Fatumaca, hafoin muda ba Venilale hodi tau-matan ba pre-spirante sira-nia ho hala’o mós knaar nu’udar administradór komunidade nian.
Hosi 2005-2007, Mons. Virgílio continua filafali ninia estudu sira iha área espiritualidade nian iha Universidade Pontifícia Salesiana (UPS), Roma. Hafoin filafali mai Timór, hosi tinan 200 to’o 2014, Mons. Virgílio hala’o ninia knaar iha Komunidade Saleziana Fatumaca nu’udar Mestre dos Noviços.
Hosi tinan 2009-2014, Kardeál dezignadu hala’o mós ninia knaar nu’udar Diretór Komunidade Saleziana Fatumaca. Iha tinan 2015, Reitór-Mór Salezianu sira-nian Don Ángel Fernández Artime, SDB hili Mons. Virgílio sai Provinsiál ba Vise-Provínsia ITM (Indonesia-Timór) nian.
Iha loron 30 janeiru 2016, Mons. Virgílio hetan nomeasaun hosi Papa Francisco hodi sai Bispu Dioseze Dili nian no iha setembru 2019 foti nia sai Arsebispu dahuluk ba Arkedioseze Metropolitana Dili nian.
Hafoin, iha loron 29 maiu 2022, iha konkluzaun Regina Coeli nian, Papa Francisco fó sai naran hirak-ne’ebé atu hola parte iha Koléjiu Kardeál sira-nian hamutuk na’in-21 no entre sira ida mak Mons. Virgílio do Carmo da Silva, SDB.
Jornalista : Arminda Fonseca
Editora : Julia Chatarina
