DILI, 01 juñu 2022 (TATOLI)—Governu liuhosi reuniaun Konsellu Ministru (KM), kuarta ne’e, delibera hodi autoriza governante na’in-haat hodi asina akordu ho Governu Repúblika Populár Xina.
Governante sira ne’ebé sei asina akordu mak Ministru Transporte no Komunikasaun, José Agustinho da Silva, atu asina akordu kona-ba servisu séreu nian, Ministru Koordenadór Asuntu Ekonómiku, Joaquim Amaral, hodi asina akordu kooperasaun ekonómika no téknika entre governu rua.
Nune’e mós, Ministra Saúde, Odete Maria Freitas Belo, hodi asina akordu ida iha área saúde no Ministru Asuntu Parlamentár no Komunikasaun Sosiál, Francisco Martins da Costa Pereira Jerónimo, hodi asina akordu ba kontinuasaun prosesu dijitalizasaun Rádiu no Televizaun Timor-Leste no ba faze daruak projetu televizaun dijitál terrestre.
Notísia relevante: Ministru Negósiu Estranjeiru Xina sei asina akordu haat durante vizita Timor-Leste
“Konsellu Ministru delibera hodi fó apoia tomak ba membru Governu hirak ne’e atu asina akordu ho Governu Repúblika Populár Xina,” Ministru Prezidénsia Konsellu Ministru, Fidelis Manuel Leite Magalhães, relata hafoin reuniaun Ezekutivu, iha auditóriu Ministériu Finansa, Aitarak-laran.
Enkuantu, Ministru Negósiu Estranjeiru Xina, Wan Yi, mai Timor-Leste iha loron 03 juñu 2022 iha ámbitu vizita ofisiál ne’ebé sei selebra akordu sira ho ministériu relevante sira.
Jornalista : Antónia Gusmão
Editora : Julia Chatarina
