DILI, 01 juñu 2022 (TATOLI)–Governu liuhosi reuniaun Konsellu Ministru (KM), kuarta ne’e, aprova projetu dekretu-lei kona-ba altersaun dahuluk ba dekretu-lei númeru 16/2004, loron 01 outubru, ne’ebé aprova ona Lei Kooperativa nian, ne’ebé aprezenta hosi Ministru Koordenadór Asuntu Ekonómiku, Joaquim Amaral.
“Ho alterasaun dahuluk ba dekretu-lei ne’e, introdús alterasaun balun ne’ebé bele sai nu’udar insentivu ba setór ne’e, tanba kooperativa sira importante tebes ba dezenvolvimentu ekonómiku nasaun,” Ministru Prezidénsia Konsellu Ministru, Fidelis Manuel Leite Magalhães, relata hafoin reuniaun ezekutivu, iha auditóriu Ministériu Finansa, Aitarak-laran.
Notísia relevante: Kooperativa CU Moris-foun Lautém presiza akompañamentu hosi SEKoop
Iha sekuénsia hosi alterasaun ida-ne’e, KM aprova projetu dekretu-lei tolu, ne’ebé aprezenta mós hosi Ministru Koordenadór Asuntu Ekonómiku, Joaquim Amaral.
Projetu dekretu-lei dahuluk maka projetu kona-ba Kooperativa komersializasaun nian, ne’ebé diploma ne’e atu estabelese rejime jurídiku espesífiku ba kooperativa komersializasaun nian.
Daruak, projetu dekretu-lei kona-ba kooperativa agríkola sira, nune’e diploma ne’e atu fó espresaun legál ba tendénsia atuál no futura sira kona-ba alargamentu hosi área tradisionál intervensaun kooperativa agríkola sira.
Datoluk, projetu dekretu-lei kona-ba kooperativa peska sira, diploma ne’e atu fó kuadru legál ne’ebé kompletu liu ba kooperativa peska sira, ne’ebé bele permite dezenvolvimentu peska sira iha Timor-Leste.
Tuir dadus ne’ebé Agência Tatoli asesu hosi Sekretaria Estadu Kooperativa (SEKoop), koperativa ne’ebé rejistadu hamutuk 324, kompostu hosi kooperativa finanseira hanesan kooperativa kréditu Union (CU, sigla portugés) 110 no kooperativa produtivu kompostu hosi kooperativa hamutuk 214.
Jornalista : Antónia Gusmão
Editora : Julia Chatarina
