BOBONARO, HEADLINE, MUNISÍPIU, SOSIEDADE SIVĺL

SJMB identifika grupu haat seidauk ezekuta orsamentu ba atividade

SJMB identifika grupu haat seidauk ezekuta orsamentu ba atividade

Diretór Sentru Juventude Munisípiu Bobonaro, Alcino Lopez. Imajen Tatoli/Sérgio da Cruz.

BOBONARO, 01 juñu (TATOLI) – Sentru Juventude Munisípiu Bobonaro (SJMB), identifika grupu juventude hamutuk haat mak seidauk ezekuta orsamentu ne’ebé apoia hosi Sekretaria Estadu Juventude no Desportu (SEJD) ba impelementasaun programa estimulasaun empreendedorizmu sosiál juventude suku.

Totál orsamentu ne’ebé SEJD prevee iha Orsamentu Jerál Estadu (OJE) 2021 ba implementasaun programa ne’e iha munisípiu Bobonaro hamutuk $ 60,000.00.

Montante ne’e fahe ba parte rua, faze dahuluk 40% ho montante $13,540.00 no 60% sei distribui iha faze daruk bainhira grupu sira-nia atividade hatudu progresu di’ak.

Enkuantu hosi montante ne’e iha grupu 40 mak selesionadu no sai benifisiáriu ba programa ne’e, mai hosi postu administrativu Atabae hamutuk grupu lima pasa ho orsamentu $4,5000,00.

Nune’e mós Bobonaro grupu sia (9) pasa ho orsamentu $6,600,00, Cailaco grupu rua (2) ho orsamentu %1.750.00, Loloto’e grupu hitu (7) ho montante $5,250,00, Balibo grupu lima (5) ho orsamentu $4,000.00 no postu administrativu Maliana grupu 12 ho orsamentu $9,500.00.

Diretór SJMB, Alcino Lopez, informa, hosi grupu benefisiáriu 40 ne’e, iha momentu distribuisaun faze dahuluk grupu 36 de’it mak konsege foti osan ho montante $12,400, enkuantu iha grupu haat mak la partisipa no rejeita simu osan ho montante $1.140.

Nune’e mós hosi grupu 36 ne’ebé hetan ona apoia, daudaun ne’e iha grupu 32 mak konsege ezekuta ona orsamentu 40%  ba sira-nia atvidade tanba   bazea ba monitorizasaun ne’ebé SJMB halo iha  fulan hirak liubá, grupu sira-nia atividade hatudu progresu di’ak.

Enkuantu hosi grupu benifísiariu 32 ne’e iha grupu haat seluk mak desde distribuisaun fundu iha loron 18 novembru tinan kotuk to’o agora seidauk utiliza orsamentu ne’e ba sira-nia aktividade tuir proposta ne’ebé submete.

“Grupu haat ne’ebé la konsege ezekuta orsamentu ida iha Raifun, momentu ami ba halo monitorizasaun ikus ne’e nia razaun dehan tanba tempu udan mak seidauk implementa, fatin karreta tula rai-henek tama ladi’ak, no grupu tolu seluk to’o agora motivu ita seidauk hatene tanba ita kontaktu mós la atende,” nia informa ba Tatoli, iha kna’ar-fatin, Maliana, kuarta ne’e.

Grupu haat ne’e ida mai hosi suku Raifun, postu administrativu Maliana, Calaco ida, Balibo ida no postu administrativu Bobonaro ida. Grupu hirak-ne’e sira-nia proposta atu utiliza osan estadu ne’e dezenvolve sira-nia atividade iha área peska hanesan hakiak ikan, oritikultura, halo modo no konservasaun meiu ambiente.

Ho kestaun ne’e, SJMB sei koopera ho SEJD forma ekipa ida halo monitorizasaun ba grupu 32 ne’ebé ezekuta ona orsamentu 40% no grupu haat ne’ebé la konsege ezekuta, hodi husu sá razaun mak impede.

“Osan ne’e ita fó atu ezekuta ba grupu, karik nia uza ba privadu ne’e responsablidade ninian tanba momentu ami dsitribui fundu ne’e iha termu entrega hatete klaru iha artigu balun, dehan orsamentu ne’e estadu tenke uza tuir regra, entaun ita ba fó hanoin katak nia la re-imbolsa mak parte relevante sei halo auditoria ba nia,” nia hateten.

Kona-bá distribuisaun faze daruak,  Alcino esklarese, balansu hosi orsamentu ne’e SJMB devolve fila-fali ba kofre estadu ho razaun  tanba ezekusaun iha 2021 tempu badak liu nune’e la konsege ezekta hotu, tanba liuhosi enkontru ho Sekretáriu Estadu Juventude no Desportu, Abrão Saldanha, iha fulan hirak liubá deside, katak orsamentu 60% sei uza fali OJE 2022.

Responsável SJMB ne’e fundamenta, antes ne’e programa ne’e Gabiente SEJD mak toma konta, mabé foin lalais ne’e iha mundansa katak iha tinan ne’e programa ne’e muda fali ba Diresaun Kreatividade Juventude.

“Signifika  katak hosi parte rua ne’e tenke koopera hotu, atu haree relatóriu kada munisípiu tama hotu maka ita prosesa, maibé osan 60% sira halo ona diskusaun, depois sira fó informasaun mai sentru, sei hatama fali proposta jerál reprezenta 60% ne’e ba hotu tiha, hafoin kria fali regulamentu ida kumula relatóriu depois osan mai ita distribui ba sira,” nia subliña.

Jornalista   : Sérgio da Cruz

Editór         : Evaristo Soares Martins

iklan
iklan

Leave a Reply

iklan
error: Content is protected !!