DILI, 02 juñu 2022 (TATOLI)–Diretór Jerál Patrimóniu Estadu hosi Ministériu Finansa, Januário da Gama, hateten, kada tinan Governu gasta osan millaun $1,6 ba subsídiu transporte.
“Atribuisaun subsídiu transporte ba diretór jerál tinan ida hamutuk $232.000, diretór nasionál $417.000, xefe departamentu $507.000 no xefe seksaun $167.000. Ida-ne’e la sura ho funsionáriu públiku baibain ne’ebé atribui kada fulan $25. Ho ida-ne’e tinan ida Governu tenki hasai millaun $1,6 ba subsídiu transporte,” Diretór informa iha ámbitu serimónia abertura sesaun traballu integradu kona-ba jestaun patrimóniu Estadu, iha salaun Komisaun Nasionál Eleisaun (CNE, sigla portugés), Caicoli, kinta ne’e.
Notísia relevante: Durante tinan-18 gasta millaun $257,8 ba kustu operasionál veíkulu Estadu
Responsável ne’e subliña, istória despeza hosi tinan 2002 to’o 2020, Governu hasai osan hamutuk millaun $125 ba de’it akizisaun veíkulu Estadu.
Enkuantu, iha períodu ne’ebé hanesan Governu hasai osan millaun $257 ba de’it kustu operasionál hanesan manutensaun no kombustível.
“Haree hosi istória alokasaun no ezekusaun ida-ne’e, ita haree katak Governu hasai osan oituan ba sosa veíkulu sira maibé ninia efeitu ba kustu operasionál ne’e a’as, tanba ne’e maka nesesita ita presiza iha polítika atu introdús hodi bele halo efesiénsia ba utilizasaun no despeza ninian,” nia akresenta.
Atu garante efetividade ba utilizasaun patrimóniu Estadu, maka Ministériu Finansa no entidade Estadu sira seluk realiza sesaun traballu ho objetivu haat hanesan atu disemina prosesu, prosedimentu no siklu kona-ba jestaun patrimóniu Estadu, enkoraja jestór sira atu sai na’in ba implementasaun polítika jestaun patrimóniu Estadu, liliu pozisiona-an hanesan fronline ba implementaun polítika jestaun patrimóniu Estadu nian, rasionaliza, efisiénsia no efetividade despeza no utilizasaun patrimóniu Estadu, inklui efisiénsia iha atribuisaun subsídiu mensál transporte no polítika jestaun nian.
Iha loron 20 setembru 2021, Governu liuhosi reuniaun Konsellu Ministru aprova Projetu Dekretu-Lei ne’ebé aprezenta hosi Ministru Finansa, Rui Augusto Gomes, kona-ba kria subsídiu mensál transporte ba servidór Estadu sira.
Montante mensál subsídiu nian ho valór funsionáriu públiku $25, Xefe sesaun $50, xefe departamentu $75, diretór nasionál $100 no diretór jerál $150.
Nune’e, Governu kalkula katak medida ne’e permite iha poupansa $700.000 resin ba kustu akizisaun no manutensaun veíkulu no kombustível nian.
Jornalista : Antónia Gusmão
Editora : Julia Chatarina
