DILI, 02 juñu 2022 (TATOLI)—Ministériu Turizmu Komérsiu no Indústria (MTKI) hamutuk ho parseiru Programa Dezenvolvimentu Nasaun Unida (UNDP, sigla inglés), kinta ne’e, fó sai rezultadu, vensedór negósiu inovativu II ba tinan 2022, ne’ebé hatudu katak joven tolu sai vensedór.
“Ha’u felisita grupu emprezariál sira ne’ebé manán iha kompetisaun ne’e, Governu tau importánsia tebes ba foin-sa’e, tanba imi mak futuru nasaun no ajenti transformadór iha setór hotu iha nasaun ne’e,” Ministru Turizmu Komérsiu no Indústria, José Lucas do Carmo, hateten, iha Sentru Konvensaun Dili (CCD, sigla portugés).
Iha faze semifinál, panelista tolu ne’ebé kompostu hosi MTKI, Embaixada Nova Zelándia no Institutu Apoiu Dezenvolvimentu Emprezariál (IADE) halo ona selesaun rigorozu hosi kandidatu joven inovativu na’in-25, ho rezultadu finál hosi selesaun deside ona tuir kompozisaun valór hosi ekipa juri no anúnsiu na’in-tolu mak tama iha finál, enkuantu na’in-12 mak hetan apoiu orsamentu hosi MTKI no UNDP.
Iha faze finál, juventude hosi grupu tolu mak liu iha sesaun ikus tanba sira ho ideia kreativu no inovativu liu iha kompitisaun, ho totál orsamentu hamutuk $5.000, ne’ebé manán-na’in dahuluk ba grupu Feto Ella Sabaun Lokál ho montante $2.250, daruak grupu Tetons Kafé Dalan Ninin $1.500 no datoluk grupu Bumbu Kaldu Timor $1.250.
Notísia relevante: Joven 25 selesionadu tama kampu treinamentu kompetisaun negósiu inovativu
Tuir Minstru, kompetisaun inovativu ho objetivu atu enkoraja joven emprendedorizmu sira hodi hamosu ideia diferente, úniku no inovativu, relasiona ho negósiu sosiál hosi setór sira hanesan agrikultura no peskas, turizmu, manufatureira, produsaun ai-han, teknolojia no mós setór seluk ne’ebé iha valór ekonómiku a’as hodi kontribui no solusiona problema iha komunidade no promove abilidade ba futuru.
“Tinan ne’e, ita foti tema negósiu inovativu hanesan ‘Harii no Haforsa Empreza Foinsa’e Sira Hodi Kontribui ba Dezenvolvimentu Sustentável’, ho nia objetivu atu asegura soberania ekonomia liuhosi aumenta produsaun lokal, kria oportunidade empregu no aumenta rendimentu família,” governante ne’e dehan.
Iha biban hanesan, Reprezentante UNDP iha Timor-Leste, Munkhtuya Altangerel, apresia ba joven inovativu sira ne’ebé hakarak dezenvolve a’an liuhosi kompetisaun negósiu inovativu hodi hatudu kreatividade no inovativu liuhosi parte negósiu hodi suporta Timor-Leste sai nasaun di’ak liután.
“Ha’u sente onradu no apresia tebes ba joven kreativu sira ne’ebé partisipa iha kompetisaun ne’e hodi dezenvolve-an. UNDP rasik nafatin fó apoiu tomak ba Governu liuhosi programa kompetisaun inovativu ne’ebé foku ba joven kreativu sira iha setór privadu sira ne’ebé hakarak dezenvolve-an, nune’e ha’u husu MTKI kontinua nafatin programa ne’e iha tinan oin tanba nia vantajen ne’e di’ak,” nia dehan.
Atribui apoiu orsamentu ba proposta negósiu
Aleinde ne’e, iha mós kompetetór na’in-12 seluk ne’ebé hetan apoiu orsamentu ba proposta negóisu iha kompetisaun negósiu inovativu.
Nune’e, grupu emprezariál 15 mak halo negósiu iha setór sira hanesan teknolojia, indústria, agrikultura no peska, iha munisípiu ualu hanesan Dili, Liquiçá, Lautém, Viqueque, Manufahi, Aileu, Baucau no Ermera.
Partisipante na’in-15 ne’ebé hetan apoiu finanseiru ba proposta inovativu planu negósiu mak hanesan,
| Nú. | Naran Empreza | Atividade negósiu | Fundu Proposta |
| 1. | Juvita Fernandes (Individu) | Bumbu Kaldu Timór | $ 7.925 |
| 2. | Monte Group | Produtu Lokál | $ 7.020,52 |
| 3. | Hyutmeran Nasae’h | Halo kolesaun ba produtu | $ 7.100 |
| 4. | Afocal Pig Fam | Hakian fahi | $ 4.500 |
| 5. | Teton’s Kafe Dalan Ninin | Kedai Kopi | $ 5.050 |
| 6. | Aimanas Belimbi DAF | Ai-manas Belimbi | $ 2.487 |
| 7. | GPL – Grupu Produtu Lokál | Hakiak manu timór | $ 7.685,48 |
| 8. | Pedro de Jesus Tai | Hakian manu lokál | $ 5.589 |
| 9. | Grupo Feto Ella Sabaun Lokal | Faan Sabun Lokal | $ 4.264 |
| 10. | Grupo Kafe Lafaek | Kafetaria | $ 6.840 |
| 11. | Grupu Agrikultura Beraka | Hortikultura | $ 6.700 |
| 12. | Essenzo Oilau | Produsaun mina hodi faan | $ 6.740 |
| 13. | Dujoroventusune | Faan manu-tolun lokal | $ 8.255 |
| 14. | Media Mudansa | Multimedia | $ 8.554 |
| 15. | Skyra Coffe shop | Kafetaria | $ 6.290 |
| Fundu totál proposta | $ 95.000 | ||
| Premémiu ba manán na’in | $ 5.000 | ||
| T o t á l | $100.000 | ||
Jornalista : Arminda Fonseca
Editora : Julia Chatarina
