HEADLINE, SAÚDE

Saudozu Sebastião Gomes nia-aman baixa iha HNGV

Saudozu Sebastião Gomes nia-aman baixa iha HNGV

Aman husi Saudozu Sebastião Gomes, Afonso Gomes. Imajen Tatoli/Felicidade Ximenes.

DILI, 02 juñu 2022 (TATOLI)— Saudozu Sebastião Gomes, nia-aman, Afonso Gomes ho idade 74, baixa iha sala VIP (Verry Important Person) Hospitál Nasionál Guido Valadares (HNGV, sigla portugés) tanba moras pulmaun no fuan.

“Pasiente Afonso Gomes, ohin dader médiku sira muda ona hosi fatin isolamentu mai iha  sala VIP   tanba  moras pulmaun,” Diretór Kliniku Hopsitál Nasionál Guido Valadares  Marcelino Correia, hateten ba Agência TATOLI iha knaar fatin-Dili.

Notísia relevante:  Ospitál Viqueque trata Saudozo Sebastião Gomes nia aman bá HNGV

Daudaun, nia dehan médiku espesialista halo ona tratamentu saúde ba Saudozu nia-aman hodi hasai raan kompletu atu halo diagnostika finál ba pulmaun.

“Ita hein rezultadu laboratóriu hodi haree nia pulmaun atu hatene pasiente ne’e moras tuberkuloze ka lae tanba ne’e mak sei prosesu tratamentu hela,” nia esplika.

Diretór ne’e dehan, hafoin médiku sira analiza rezultadu diagnostika mak iha indikasaun ruma moras pulmaun grave bele transfere ba rai li’ur.

“Médiku sira observa kondisaun pasiente nian diak. Nune’e aban médiku sira fó sai karik iha indikasaun ruma ita halo transferénsia ba rai liur,” nia informa.

Entertantu, Doutora Internamentu Viqueque, Mónica Maria, informa iha loron 30 maiu, ospitál internamentu munisípiu Viqueque deside halo transferénsia pasiente Afonso Gomes ho idade 74, hanesan aman hosi saudozu Sebastião Gomes mai Ospitál Nasionál Guido Valadares (HNGV, sigla portugés), tanba sofre pulmaun no fuan.

Saudozu ninia aman iha moras seluk, antes ne’e iha tuberkuloze (TBC) komulár maibé halo tratamentu durante fulan-ualu.

“Ami haree daudaun ne’e nia kondiasaun jerál  sei  iha iis boot no mear, ne’ebé ami fó  tratamentu antibiótiku durante loron-tolu, maibé sei nafatin moras. Ami iha ne’e ai-moruk limitadu. Tanba ne’e, ami haruka bá HNGV hodi doutór espesialista sira bele fó tratamentu kontinuasaun ba saudozu Sebastião nia aman”, nia akresenta.

Notísia relevante: Gregorio Saldanha husu Governu apoiu saudozu Sebastião Gomes nia inan-aman

Jornalista : Felicidade Ximenes

Editora     : Florencio Miranda Ximenes

iklan
iklan

Leave a Reply

iklan
error: Content is protected !!