DILI, 06 juñu 2022 (TATOLI)—Instituto para a Defesa dos Direitos das Crianças (INDDICA) hato’o ona nia paresér ba Parlamentu Nasionál (PN) hodi reajenda no halais diskusaun no aprova lalais projetu-lei protesaun labarik no joven iha perigu iha Timor-Leste tanba pendente hela iha PN.
Notísia Relevante: Komisaun F sei halo re-abertura ba artigu balun projetu-lei protesaun labarik
“Paresér INDDICA nian ba Parlamentu Nasionál ho projetu-lei Protesaun Labarik no joven iha perigu mak Parlamentu Nasionál reajenda no halais plenária ba diskusaun no aprovasaun ba projeitu-lei refere no husu PN liu-liu Komisaun F disponivel no aselera iha tinan ne’e nia-laran,” Diretora Jerál INDDICA, Teresa Maria da Costa Freitas, hateten ba Agência TATOLI, iha nia knar fatin Caicoli, Dili, segunda ne’e.
Diretora ne’e hatutan, tanba daudaun ne’e projetu-lei protesaun labarik no joven iha perigu ne’e iha PN atu halo diskusaun no atu halo apresiasaun ba lei refere tanba Komisaun F iha PN atu halo reabertura ba artigu balun.
“Bainhira projetu-lei ne’e aprova no tama envigor mak fó ona biban ba INDDICA tuir lei 04/2021, 21 janeiru, katak INDDICA nia papel mak halo akompañamentu no halo monitorizasaun no mós fó protesaun no fó promosaun ba labarik sira,” Teresa hateten.
Ho ida-ne’e, nia hein diskusaun no aprovasaun hosi PN, INDDICA kontinua esforsu hodi hakbesik ba labarik sira no enkoraja sira, nune’e mós halo aproximasaun ba inan-aman sira atu haree labarik sira-nia ne’ebé moris iha dalan ninin.
“Ami kontinua esforsu atu hakbesik ba labarik sira iha dalan ninin ne’ebé mak faan no ami mós aproxima ba sira-nia inan-aman maibé inan-aman dehan mai ami katak ami-nia oan ami mak manda no Governu atu halo saida ba ami-nia oan. Ida-ne’e sai dezafiu ida ba ami,” nia haktuir.
Maibé, nia dehan, INDDICA la’o tuir lei 04/2021 nian no iha konstituisaun RDTL artigu 18 hateten labarik sira tenke hetan protesaun espesiál, dahuluk mak família ka inan-aman depois mak komunidade no sosiedade hafoin ba mak Estadu.
“Barreira dezafia ami mak inan-aman nia koñsimentu la to’o iha ne’ebá, entaun ami-nia esforsu no papel mak tenke divulga informasaun liuhosi mídia no liuhosi halo teatru ruma, nune’e ema hatene. Tanba, ohin loron tenke tau prioridade no hakarak ka lakohi tenke investe tenke Governu mós fó ona nia apoiu ministériu relevante sira,” nia dehan.
Notísia Relevante: Komisaun F sei submete paresér projetu-lei protesaun labarik ba PPN
Dadus labarik iha Timor-Leste iha tinan 2016, ne’ebé mak Agência TATOLI asesu hosi Inpesaun Jerál Traballu (IGT-sigla portugés), labarik hamutuk na’in-421.655. Atividade ne’ebé labarik sira halo 16,1 % (67.688) nu’udar ekonomikamente ativu mak labarik-mane na’in 32.995 no labarik-feto na’in 34.300.
Hosi ne’e, na’in 62.710 iha área rurál no 4.978 iha área urbana. Depois 70,7% tuir eskola de’it; 13,2% iha empregu no eskola; 2,9% iha empregu de’it no 13,2% laiha empregu no laiha eskola.
Empregu ba labarik iha atividade ekonómiku mak labarik sira servisu iha to’os no produsaun modo 55,6% (mane 50,9% vs feto 40,1%). Traballadór servisu doméstiku no restaurante: 25,9% (mane 40,2% no feto 59,8%). Labarik sira faan iha estrada: 8,3% no seluk: 10,2%.
Iha dadus ne’e hatudu katak labarik na’in 22.395 halo servisu perigozu no mós bá eskola (76,7% hosi traballu infantíl iha servisu perigozu). Labarik sira iha servisu perigozu parese atu hasoru dezvantajen relasiona ho frekuénsia eskola kompara ho sira-ne’ebé halo servisu perigozu. Labarik ho idade 5-17 na’in 43.000 relata katak nunka bá eskola
Notísia Relevante: PN aprova projetu-lei protesaun ba labarik iha jeneralidade
Jornalista : Osória Marques
Editór : Cancio Ximenes
