iklan

EKONOMIA, COVALIMA

MAP kolleta hare área kultivu ektare 1,624 iha suku Raimea

MAP kolleta hare área kultivu ektare 1,624 iha suku Raimea

Ministru Agrikultura no Peska, Pedro Reis, akompañia hosi adjunta xefe kaza sivil Prezidente Republika, Henriqueta Maria da Silva, no parseiru sira kolleta hare iha suku Raimea, Postu Zumalai. Imajen Tatoli/Celestina Teles.

COVALIMA, 06 juñu 2022 (TATOLI)—Ministru Agrikultura no Peska (MAP), Pedro Reis hamutuk ho adjunta Xefe Casa Sivil Prezidente Repúblika, Henriqueta Maria da Silva, no parseiru sira kolleta hare área kultivu ektare 1,624.

Iha biban ne’e, Governu ho parseiru sira halo demo ba área hare ektare 120 ne’ebé utiliza adubu órganiku poc nasa, supernasa no armonik iha suku Raimea, aldeia Beilaco, postu administrativu Zumalai, munisípiu Covalima.

Ministru Agrikultura no Peska, Pedro Reis, akompañia hosi adjunta xefe kaza sivil Prezidente Republika, Henriqueta Maria da Silva, no parseiru sira kolleta hare iha suku Raimea, Postu Zumalai. Imajen Tatoli/Celestina Teles.

“Ita-nia problema ne’ebé durante ita-hasoru mak fornese bee ba natar, tanba ne’e ami ko’alia ona  planu iha grande opsaun ne’ebe suporta hosi Parlamentu Nasionál, tanba natar iha suku Raimea ektare 2000 -resin, maibé ita dezenvolve de’it 1000 -resin,  tanba bee menus fornese ba natar,”  Govenante ne’e hateten liuhosi nia diskursu bainhira kolleta hare iha suku Raimea, postu Zumalai, segunda ne’e.

Ho nune’e, problema ne’ebé povu  agrikultór sira enfrente hanesan menus bee fornese ba natar hodi hasa’e produsaun iha rai-laran, Governu sei la konstrui irrigasaun ne’ebé boot maibé sei esforsu  destaka eskavadór lokaliza iha Covalima hodi fasilita bee ba natar atu agrikultór sira bele halai natar.

“Ita sei la halo irrigasaun boot pelumenus preokupasaun bee laiha, ami sei esforsu sei destaka eskavadór ida-ne’ebe atu lokaliza hodi fasilita bee, ita bele halai natar ho másimu bele hasa’e produsaun iha rai-laran,” nia hateten.

VIII Governu konstituisionál nia programa ne’ebé di’ak hanesan programa sesta bázika liu ona, maibé kolleta hare ohin sei la responde programa sesta bázika.

“Kolleta hare ohin ita atu responde ba programa sesta bázika, ita onestu ita-nia konsumu nasionál ne’e tonelada rihun 131 maibé ministériu esforsu foin atinje tonelada 72,000 entaun produsaun rai-laran sei la sufisiente no subtitui ho produsaun seluk,” nia dehan.

Produsaun ne’ebé prodú hosi agrikultór sira. MAP sei servisu hamutuk ho Ministériu Koordenadór Asuntu Ekonómiku no Ministériu Turizmu Komérsiu Indústria (MTCI) implementa programa sesta bázika 75% tenke produtu lokál.

Ministru Agrikultura no Peska, Pedro Reis, akompañia hosi adjunta xefe kaza sivil Prezidente Republika, Henriqueta Maria da Silva, no parseiru sira kolleta hare iha suku Raimea, Postu Zumalai. Imajen Tatoli/Celestina Teles.

Adjunta Xefe Kaza Sivil Prezidente Repúblika, Henriqueta Maria da Silva hateten, serimónia kolleta hare iha Zumalai, povu agrikultór sira hein prezensa hosi Prezidente Repúblika maibé nia labele marka prezensa tanba iha servisu seluk.

Maske Xefe Estadu la marka prezensa iha serimónia ida-ne’e maibé nia mós iha programa lubuk  ida atu promove produtu lokál.

“Xefe Estadu iha programa importante lubuk ida inklui oinsá atu promove produtu lokál nomós atu asegura ita-nia nasaun ida-ne’e bele iha ai-han sufisiente, ita rona mós iha seguransa ai-han, iha nutrisaun di’ak fó ba labarik no inan-isin rua sira,” nia dehan.

Xefe Estadu fó atensaun ba labarik no inan isin-rua ho intensaun ida katak han ai-han ne’ebé sufisiente no nutrisaun ne’ebé nutriente sei prodús jerasaun ne’ebé di’ak iha Timor-Leste.

“Ho intesaun katak se labarik no inan isin-rua ladún han ai-han ne’ebe nutrient, ita sei la prodús jerasaun ne’ebé di’ak iha nasaun ne’e hodi bele prenxe dezenvolvimentu ne’ebe ita hasoru,” nia esplika.

Tanba ne’e, iha gabinete Xefe Estadu iha mós programa atu kombate má nutrisaun promove ai-han lokál no ai-han ne’ebe nutrisaun di’ak ne’ebé servisu hamutuk ho WFP, MAP, embaixadór brazil sira hodi buka fundu apoiu Governu.

Iha serimónia kolleta hare ne’e partisipa hosi Ministru Agrikultura no Peska ho nia ekipa, adjunta xefe kaza sivil Prezidente Repúblika, embaixadór Brazil iha Timor-Leste, reprezentante hosi JICA, diretór munisipál, autoridade lokál no komunidade.

Jornalista : Celestina Teles

Editór       : Cancio Ximenes

iklan
iklan

Leave a Reply

iklan
error: Content is protected !!