VIQUEQUE, 06 juñu 2022 (TATOLI)—Ministériu Agrikultura no Peska (MAP) serbisu hamutuk ho Organizasaun Naun Govermentál Food Agrikulture Organization (FAO) kapasita povu agrikultór hosi suku Caraubalo, postu administrativu Viqueque vila, kombate pesti Lakataru.
“Ami serbisu hamutuk ho MAP liuhosi Departamentu Protesaun Planta hodi mai fó kapasitasaun ba povu agrikultór sira atu kombate pesti lakataru, ne’ebé estraga ita-nia agrikultór sira-nia batar no hare,” Koodenadór Formasaun Organizasaun FAO, Filipe Mesquita, hateten ba Agência Tatoli, iha sede suku Caraubalo, segunda ne’e.
Atividade ne’e FAO la’o hamutuk ho Governu ho maneira ida atu kombate pesti, nune’e Governu bele rekoñese maneira kombate peste lakataru.
Notísia relevante: Governu tau importánsia dezenvolve setór agrikultura
Objetivu kapasitasaun ba komunidade agrikultór ne’e atu ajuda agrikultór sira koñese lakataru iha to’os-laran, tanba fatin ne’e iha peste oin-oin.
“Nune’e, kapasitasaun ne’e ami hamutuk ho agrikultór sira identifika lakataru makerek sira iha to’os-laran. Ami hatudu ba sira atu sira bele hatene no oinsá maka atu kombate ka oho lakataru makerek. Hodi lakataru labele estraga ita-nia batar, labele estraga haree no labele estraga ai-horis sira seluk. Tanba ita-nia komunidade agrikultór Caraubalo ne’e la’ós kuda batar de’it, ho ida-ne’e ita fó tekniku hamate lakataru liuhosi kapasitasaun,” nia akresenta.
Kapasitasaun ne’e ba suku ida durante loron-rua, ho teoria no prátika maka uza ai-moruk pestesida ba to’os hodi rega pestesida ba batar ne’ebé lakataru komesa han, batar balun ne’ebé iha sinál estragu hosi lakataru, hafoin rega ai-moruk pestesida durante oras rua hanesan ne’e ba fali to’os hodi haree rezultadu.
“Bainhira kapasitasaun ne’e ramata, ita-nia komunidade agrikultór sira bele kompreende hodi implementa rasik kombate lakataru. Depois sira mós hato’o tutan ba maluk sira seluk ne’ebé la partisipa iha kapasitasaun ne’e, ho maneira kombate no hamate lakataru ne’e ba ita-nia komunidade hodi salva hahán sira iha to’os-laran,’ nia tenik.
Kapasitasaun kombate lakataru ne’e iha kada suku partisipa hosi ema na’in-40, kompostu hosi autoridade suku, komunidade agrikultura no grupu agrikultór sira ne’ebé iha suku Caraubalo.
Jornalista : Vitorino Lopes da Costa
Editora : Julia Chatarina
