Populasaun na’in-50.000 iha Dili simu ona vasina Booster Pfizer
DILI, 06 juñu 2022 (TATOLI)— Tuir dadus estatístika hosi Servisu Saúde Munisípiu Dili hatudu katak too 06 juñu 2022, populasaun iha munisípiu Dili na’in-50.000 mak simu ona vasina doze datoluk ho tipu Booster Pfizer.
“Vasina faze datoluk iha munisípiu Dili hatudu partisipasaun masimu hosi populasuan idade 18 too 60 ne’ebé mak ita vasina ona besik 50.000,” Diretora Servisu Saúde Munisípiu Dili Agostinha Segurado, informa ba jornalista sira iha Hotél-Timor, segunda ne’e.
Daudaun ne’e, númeru vasina doze dahuluk iha kapitál Dili kontinua ki’ik, nune’e kontinua loke programa vasinasaun iha sentru saúde no postu saúde sira atu komunidade sira bele hakbesik an hodi simu vasina atu prevene an hosi COVID-19.
“Ita loke vasina iha sentru saúde sira ne’e laos atende ba doze dahuluk no daruak , maibé ita mós simu nafatin idade adultu sira simu vasina datoluk hodi aumenta imunidade hasoru COVID-19 ,” nia afirma.
Entertantu, populasaun elijível tinan 18 ba leten, ne’ebe simu ona vasina to’o iha loron 05 juñu 2022, tuir sistema informasaun Saúde iha Ministériu Saúde, hanesan kumulativu 1ª doze iha Dili (87,4%) no kumulativu 2ª doze iha Dili (82,5%).
Enkuantu, Sidadaun iha territóriu nasionál ne’ebé simu ona vasina doze dahuluk iha Timor-Leste 85,5% no simu ona doze daruak 73,6%.
Notísia relevante: COVID-19: kazu óbitu na’in-ida no ativu 26
Jornalista : Felicidade Ximenes
Editór : Florencio Miranda Ximenes
