DILI, 06 juñu 2022 (TATOLI)–Sindikatu Profesór Timor-Leste (SPTL) konsidera Ministériu Edukasaun Juventude no Desportu (MEJD) halo injustisa hasoru kargu xefia diretór Eskola Tékniku Vokasionál (TEKVOK) hamutuk 58 tanba to’o agora sira la hetan direitu pagamentu retroativu.
Prezidente SPTL, Francisco da Costa, hateten, prosesu kargu xefia ba diretór Eskola TEKVOK hamutuk 20, ne’ebé estabelese iha territóriu nasionál to’o ohin loron sei problema hela, maski obriga la’o hela maibé buat hotu sei prosesu hela.
“Diretór sira ne’e la hetan sira-nia direitu ba subsídiu to’o ohin loron. Ami konsidera ita-nia Governu liuhosi Ministériu Edukasaun Juventude no Desportu halo ona injustisa, tanba saida maka Diretór sira iha Eskola Jerál hetan direitu ba subsídiu maibé diretór iha Eskola Tékniku Vokasionál ne’ebé estabelese desde tinan 2016 la hetan fali rekoñesimentu,” Prezidente SPTL informa ba Agência Tatoli, iha edifísiu MEJD, Vila Verde, segunda ne’e.
Notísia relevante: MEJD promete dezembru sei selu retroativu profesór 54 asume kargu diretiva
Nia esplika, durante ne’e profesór sira iha Eskola Tékniku Vokasionál ne’ebé hetan konfiansa hodi asume kargu xefia nu’udar diretór, to’o agora Governu la fó konsiderasaun.
Tuir Francisco da Costa, durante ne’e laiha lei ida maka atu garante reforsa Eskola TEKVOK ninia ezisténsia, ne’ebé MEJD estabelese hodi nomea kargu xefia ne’e mós laiha lei ida mak atu regula sira.
“Diretór Tékniku Vokasionál sira ne’ebé hetan nomeasaun atu asume de’it kargu hodi realiza prosesu ensinu maibé rekoñesimentu Ministériu Edukasaun Juventude no Desportu ba sira-nia serbisu ne’e laiha, ne’ebé saláriu kontinua la’o hanesan funsionáriu baibain,” nia akresenta.
Nune’e mós, Diretór Jerál Administrasaun no Finansa MEJD, Antoninho Pires, hateten, nia parte la promete, maibé preokupasaun diretór sira ne’e sei hato’o ba Ministru atu buka solusaun.
“Ha’u ohin rona no simu de’it ita-boot sira-nia rekomendasaun no preokupasaun, maibé ha’u sei hato’o ba Ministru nu’udar superiór atu buka solusaun hodi rezolve problema ne’ebé ita-boot sira enfrenta tanba nia labele garante buat ida,” Diretór dehan hafoin enkontru ho ekipa SPTL.
Jornalista : Tomé Amado
Editora : Julia Chatarina
