iklan

JUSTISA, BAUCAU, HEADLINE, MUNISÍPIU

TDB aplika medida koasaun ba arguidu VG no SG

TDB aplika medida koasaun ba arguidu VG no SG

Edifísiu Tribunál Distritál Baucau. Imajen Tatoli/Natalino Belo.

BAUCAU, 06 juñu 2022 (TATOLI) – Tribunál Distritál Baucau liuhosi interogatóriu dahuluk ba kazu rai deside medida koasaun prizaun preventiva ba arguidu na’in-rua insiál BG no SAG tanba deskonfia hakanek vítima RF.

Kazu refere rejista ho númeru Nuc 0016/21 ne’ebé akontese iha loron 1 fulan-juñu, suku Omen, postu administrativu Laútem, munisípiu Laútem bainhira deskuti malu tán rai entre arguidu na’in-tolu inisiál VG, BG no SAG ho RF iha área Vese hodi hamosu SG tebe kanuru suru-rai kona RF nia ain.

Bainhira arguidu sira tuir dalan fila-uma to’o iha área Luliberek, mosu grupu ne’ebé organiza hosi JF (oan hosi RF) atake arguidu na’in-tolu hodi hamosu konflitu no arguidu SAG konsege hadau samurai hodi rezulta vítima RF kanek iha liman.

Iha loron hanesan, Polísia Nasionál Timor-Leste (PNTL) Munisípiu Laútem halo kedas atuasaun no halo apreensaun ba arma branka no kontinua hala’o investigasaun ba akontesimentu refere.

Ministériu Públiku akuza arguidu na’in-tolu ho Lei númeru 5/2017 kona-ba arma branka, artigu 20 aliña 1, 2 no kódigu penál artigu 146 kona-ba ofensa integridade fízika grave sei hetan pena prizaun tinan 2 to’o tinan 8.

Iha prosesu julgamentu, tribunál aplika prizaun preventiva ba BG no SAG, enkuantu VG aplika termu indentidade rezidénsia tanba idade no la envolve direita hodi hakanek RF.

Defensór Públiku José de Lima ne’ebé fó asistensia legál ba aguidu na’in-tolu, hateten, respeita desizaun tribunál maibé sei halo rekursu husu atu husu tribunál altera medida koasaun prizaun preventiva hodi hatún ba medida koasaun aprezentasaun periódika tanba hakarak Ministériu Públiku deskobre faktu no arguidu loloos hosi kazu refere.

“Razaun rekursu tanba sira la’ós autór maibé hetan asaltu hodi grupu ne’ebé organiza hosi RF,” José de Lima hateten iha Vila Nova, segunda ne’e.

José de Lima akresenta, realidade ne’ebé akontese iha terenu grupu ne’ebé sai vítima mak organiza asaltu uluk arguidu sira nune’e arguidu na’in-tolu defende-aan maibé tanba razaun kanek no aprezenta uluk keixa entaun ikus-mai tenke sai fali arguidu.

Prosesu julgamentu ne’e prezide hosi juis singulár, José Eskurial, Ministéru Públiku reprezenta hosi Ambrosio Freitas Rangel no arguidu na’in-tolu hetan asistensia legál hosi defensór José de Lima.

Jornalista    : Natalino Belo

Editór           : Evaristo Soares Martins

iklan
iklan

Leave a Reply

iklan
error: Content is protected !!