iklan

BOBONARO, HEADLINE, MUNISÍPIU, SEGURANSA

UPF halo apreensaun ba kilat-manu ilegál hosi Atambua

UPF halo apreensaun ba kilat-manu ilegál hosi Atambua

Kilat manu sharp tiger ne'ebé Unidade Patrulamentu Fonterira (UPF) halo apreensaun ba sasán ilegál iha área suku Tapo-Memo, postu administrativu Maliana, munisípiu Bobonaro. Imajen espesiál.

BOBONARO, 06 juñu 2022 (TATOLI) – Polísia Nasionál Timor-Leste liuhosi Unidade Patrullamentu Fronteira (UPF), akompaña Alfa postu Memo, munisipiu Bobonaro, segunda ne’e halo apreensaun ba kilat-manu no manu-futu ne’ebé sidadaun sira hatama ilegál hosi Atambua, Indonézia.

Komandante UPF, Superintendente Eulides Bello, informa, objetu hirak-ne’e membru sira halo apreensaun iha área Memo, suku Tapo-Memo, postu administrativu Maliana, munisípiu Bobonaro purvolta tuku 05:00 komposta hosi hosi kilat-manu tipu sharp tiger lolon 17, manu-futu 12 no ai-kameli karón ida.

Kilat-manu no manu-futu hirak-ne’e sidadaun sira tula iha mikrolete ida ho objetivu atu hatama mai territóriu Timor-Leste tuir dalan ilegál maibé membru UPF konsege halo kedas intervensaun, enkuantu na’in ba sasán hirak-ne’e halai lakon.

Alende ne’e iha oportunidade ekipa kontrolu no vijilánsia fronteira mós konsege halo apreensaun tán ai-kameli saku ida tula iha motorizada iha fatin hanesan, maibé  polísia la konsege kaptura sasán na’in tanba halai lakon hotu.

Ai-Kameli ne’e mak sidadaun timor-oan sira tenta hatama ilegál ba Atambua, Indonézia. Imajen espesiál.

“Ai-kameli ne’e deskonfia hosi polísia nian katak, iha posiblidade atu halo tranzaksaun ilegál ba nasaun viziñu Indonézia, maibé kilat manu 17 no manu 12 ne’ebé daudaun ne’e iha kompañia Alfa ne’e deskonfia halo tranzaksaun ilegál mai Timor-Leste,” nia informa ba Agência TATOLI liuhosi telefónika.

Tuir nia, atividade hirak-ne’e konsidera hanesan krime dezobediénsia hasoru lei, tanba ne’e polísia kontinua buka autór sira atu responsabiliza aktu ne’ebé komete, maibé objetu hirak- ne’e lori ona ba asegura kuartél Unidade Patrullamentu Frontera, Nu-Badak, suku Batugade, postu administrativu Balibo hodi prepara ba prosesu kontinuasaun iha Ministériu Públiku.

Unidade Patrullamentu Fronteira sei kontinua asegura evidénsia hirak-ne’e no halo prosesu alistamentu hafoin kanaliza relatóriu ba komandu jerál.

“Embora ida-ne’e mós garante sidadaun sira atu disilpina, kumpre nafatin regra nasaun nian katak, hatama no hasai sasán tranzaksaun tenke legál, labele ilegál. Kuandu ilegál PNTL sei la fó toleránsia atu hirak-ne’e livre,” nia hateten.

Relasiona ho kazu ne’e Superintendente ne’e dehan, UPF kontinua serbisu hamutuk ho autoridade lokál sira-ne’ebé hela besik fronteira atu halo vijilánsia másimu iha liña fronteira nune’e bele kontrola movimentu atividade tranzaksaun ilegál.

Atu minimiza atividade tranzaksaun ilegál UPF mós nafatin koopera serbisu ho autoridade seguransa viziñu hanesan  Forsa Nasionál Indonézia (TNI, sigla indonézia), Polísia Indonézia nian no autoridade sivíl sira seluk kria armonizasaun atubele garante movimentu sidadaun nasaun rua nian.

Jornalista   : Sérgio da Cruz

Editór         : Evaristo Soares Martins

iklan
iklan

Leave a Reply

iklan
error: Content is protected !!