NASIONÁL, POLÍTIKA

2023: Governu sei aloka millaun $16,6 ba ‘bolsa da mãe jerasaun foun’

2023: Governu sei aloka millaun $16,6 ba ‘bolsa da mãe jerasaun foun’

Diretór Jerál Administrasaun no Finansa Ministériu Solidariedade Sosiál no Inkluzaun (MSSI), Rui Manuel Gago Exposto. Imajen Tatoli/Osória Marques.

DILI, 07 juñu 2022 (TATOLI)—Diretór Jerál Administrasaun no Finansa Ministériu Solidariedade Sosiál no Inkluzaun (MSSI), Rui Manuel Gago Exposto, hateten iha 2023 MSSI sei implementa tan bolsa da mãe jersaun foun iha munisípiu Liquiça, Covalima, Manatuto no Viqueque ho orsamentu millaun $16,6.

Notísia Relevante: 17 jullu: BNCTL sei halo pagamentu ba “bolsa da mãe jerasaun foun”

“Hosi programa ne’e, Governu sei aloka tan orsamentu ba munisípiu haat ne’e ho montante millaun $16,6,” Rui Gago hateten ba Agência Tatoli, hafoin asina akordu ho Ministériu Saúde (MS) kona-ba bolsa da mãe jerasaun foun, iha salaun MSSI Caicoli, Dili, tersa ne’e.

Bazea ba dekretu lei 22/2021, 10 novembru ne’e, katak iha tinan 2022 ita sei implementa programa bolsa da mãe jersaun foun ba iha Ainaro, Bobonaro ho RAEOA depois iha tinan 2023 ne’e ita sei habelar no haluan tan ba munisípiu haat Liquiça, Covalima, Manatuto no Viqueque.

Maibé, iha orientasaun polítika balun mak ekipa presiza tau konsiderasaun katak iha posibiliadade iha 2023 aumenta tan munisípiu Ermera, Dili no Baucau.

“Ita sei iha posibilidade ba iha Munisípiu Ermera, Dili no Baucau. Maibé ida-ne’e iha prosesu nia laran no depende mós ba orsamentu ne’ebé alokadu mai iha programa bolsa da mãe jerasaun foun ne’e,” nia hateten.

Tuir nia, programa refere sei implementa iha territóriu nasionál iha tinan 2024 no iha tinan ne’e Governu sei finaliza programa ‘bolsa da mãe jerasaun foun’ iha Timor-Leste.

“Tanba iha komitmentu katak programa bolsa da mãe jerasaun foun ne’e di’ak, tan ho nia objetivu atu redús probreza, atu redús má nutrisaun no mós raes badak iha Timor-Leste inklui estimula ekonómia família, nune’e Governu hanoin no esforsu atu bele aselera no implementa programa ne’e iha nivel territóriu nasionál iha 2024,” nia informa.

Daudaun ne’e, ekipa dezeñu programa sei hala’o preparasaun hela. Maibé, antes ne’e, Governu aloka osan ba programa bolsa da mãe jerasaun iha 2022 nian ne’e kuaze milaun $6,9.

Jornalista : Osória Marques

Editór       : Cancio Ximenes

iklan
iklan

Leave a Reply

iklan
error: Content is protected !!