DILI, 07 juñu 2022 (TATOLI)—Koordenadór Sentru Formasaun Téknika Komunikasaun (CEFTEC-sigla portugues), Rafael da Silva Freitas, informa tempu badak CEFTEC sei submete relatóriu estabelese Institutu Formasaun Jornalista ba Ministériu Asuntu Parlamentár no Komunikasaun Sosiál (MAPKOMS).
Nia hatutan, hafoin ne’e Ministru Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo, sei aprezenta ba Konsellu Ministru (KM) atu bele dabate.
Notísia Relevante: CEFTEC realiza simpóziu nasionál antes estabelese Institutu Formasaun ba Jornalista
“Relatóriu agora elabora hela, tanba simpoziu nasionál foin lalais ne’e ami halo ba loron rua. Iha Simpoziu Nasionál loron daruak ne’e Ministru Francisco Martins da Costa Pereira Jerónimo ba relata relatóriu verbál kuaze 50%, hosi atividade sira-ne’ebé la’o. Maibé, relatóriu eskrita sei elabora hela hosi João Cancio Freitas servisu hamutuk ho CEFTEC hodi finaliza, nune’e tempu besik lori ona ba MAPKOMS,” Rafael da Silva Freitas hateten ba Agência Tatoli, iha nia knar fatin, Palácio Governu, Dili, tersa ne’e.
Relatóriu estabelese Institutu Formasaun ba Jornalista ne’e akumula hotu atividade ne’ebé CEFTEC hala’o ona, hanesan Semináriu Internasionál, foku diskusaun grupu, estudu nesesidade formasaun ba jornalista iha Timor-Leste no atividade simpóziu nasionál.
“Iha estudu nesesidade formasaun ba jornalista iha Timor-Leste, CEFTEC halo liuhosi Consultório Língua Portuguesa, ita-nia formadór hosi CLJ mak halo no hetan ona validasaun siéntifiku hosi portugál,” nia dehan.
Notísia Relevante: Estabelesimentu Institutu Formasaun ba Jornalista atinje ona 70%
Jornalista : Nelia Fernandes
Editór : Cancio Ximenes
