Servisu Saúde Manufahi enfreta problema rekursu umanu
DILI, 08 juñu 2022 (TATOLI)— Diretora Servisu Saúde Munisípál Manufahi Florencia Cortereal Tilman, informa daudaun ne’e postu saúde haat iha munisípiu Manufahi mak seidauk iha profisionál saúde, nune’e kontinua halo klinika movél kada fulan-ida hodi konsulta komunidade sira.
“Ami iha munisípiu Manufahi menus tebes ba profisionál saúde liuliu médiku, enfermeiru no parteira. Iiha munisípiu Mnaufahi iha postu saúde hamutuk 23, hosi númeru ne’e postu saúde haat mak seidauk iha pesoál saúde,” Diretora Servisu Saúde Munisípal Manufahi ne’e hateten ba Agência TATOLI iha Hotél Timor, kinta ne’e.
Postu Saúde ne’ebé laiha pesoál saúde mak hanesan sentru saúde weberek ailora-Allas, Postu saúde Foholau-Turiskai, postu saúde Tutuluro iha Same-vila no postu saúde Aitemua iha Turiskai nian.
“Iha postu saúde haat ne’e laiha pesoál saúde, maibé ami sempre halo mobile clinic ba iha ne’ebá kada fula ida dala-tolu hodi fó asisténsia médika ba populasaun sira,” nia afirma.
Tinan kotuk, Ministériu saúde halo rekrutamentu ba internatu hodi koloka ba iha ne’ebá, maibé sira ne’e saúde públika.
“Sira hala’o servisu ba iha saúde na familia vizita ba uma kain sira entaun ida ne’e mak durante ami halo,” nia akresneta.
Pesoál saúde iha munisípiu Manufahi hanesan médiku na’in-30, Enfermeiru 29 no Parteira 30, ne’ebé durante ne’e kobre ba iha sentru saúde haat iha Manufahi no postu saúde iha 23, kompsotu internamentu ida no maternidade haat.
“Médiku sira ne’e uluk koloka hotu ba iha postu saúde sira ne’e, maibé barak mak muda mai iha Dili tanba moras no iha kestaun seluk entaun daudaun ne’e ita enfrenta hela problema ba iha rekursu umanu,” Diretora ne’e preokupa.
Politika VIII Governu Konstituisaun mak sei kontinua implementa Polítika Nasionál kona-ba Saúde ho Planu Estratéjiku Nasional Saúde iha setor saúde 2011-2030 (PENSS 2011-2030), hodi mantein vizaun kona-ba “Timor-Leste saudável”, ne’ebé timoroan hotu bele iha asesu ba saúde.
Inisiativa Governu nian kona-ba setor saúde sei kontinua orienta ba oinsá maksimiza esforsu tomak, hodi garante prestasaun servisu ne’ebé di’ak liu, iha setor ida ne’e, no mos jeneraliza (ka habelar) asesu ba kuidadu saúde ho kualidade, no halo avaliasaun beibeik kona-ba efisiênsia, transparênsia ho profisionalizmu, iha jestaun rekursu finanseiru, umanu, materiál no lojístiku, infraestrutura ho ekipamentu sira.
Governu mós sei kontinua hametin Sistema Nasional Saúde ne’ebé reprezenta hosi elementu independente ne’ebé kontribui ba saúde ho bein-estar família hotu nian, nomós iha estabelesimentus ensinu, iha fatin servisu no iha fatin públiku no iha komunidade-nia leet liuhusi kapasitasaun ba instituisaun ne’ebé presta kuidadu Saúde, ba profisionál saúde, ba sistema fornesimentu no distribuisaun medikamentu ho sistema emerjênsia médika.
Nune’e, Iha OJE 2019 too 2021, MS prevee orsamentu kuaje millaun $200-resin hodi dezenvolve fasilidade saúde, ekipamentu saúde no profisionál saúde atubele mellora atendimentu no hakbesik saúde ba sidadaun sira.
Jornalista : Felicidade Ximenes
Editór : Florencio Miranda Ximenes
