DILI, 09 junu 2022 (TATOLI)—Kandidatu traballadór Korea ne’ebé sena malu no hadau malu atu rejistu naran, Bonifascio Paicheco, husu Governu liuhosi Sekretária Estadu Formasaun Profisionál no Empregu (SEFOPE) kria sistema rejistu iha sentru formasaun sira, nune’e bele hafasil prosesu rejistu.
Notísia Relevante: MKAE enkoraja traballadór bá Koreia Súl serbisu ho responsabilidade
“Ami husu sistema rejistu ne’e karik bele rejistu tuir ida-idak nia sentru formasaun, nune’e bainhira iha teste ezame mak ami mai tuir iha ne’e. Tanba, ho sistema ne’ebé sira (SEFOPE) halo hanesan formandu sira iha sentru formasaun iha munisípiu, tantu iha Dili laran mai rejistu hotu. Eentaun, bele akontese sena malu, tanba fatin ne’e mós la sufisiente ba ami,” Bonifacio Paicheco hateten ba Agência Tatoli, iha Sentru Formasaun lian Korea Becora, Dili, kinta ne’e.
Ho akontesimentu ne’e, nia sente triste ho Governu nia atendimentu ba joven sira sena malu atu bele rejistu no konsidera SEFOPE la organiza ho di’ak.
“Ha’u sente triste ho sira (SEFOPE) nia atendimentu, tanba momentu rejistu ne’e sena malu, tanba fatin la sufisiente. Aleinde ne’e, ita-nia membru PNTL sira mai haree situasaun ne’e, sira tama ho asaun brutál, hanesan lori stick baku, tuku no tebe. Ho ida-ne’e, moru bele aas no besi bele kro’at, ami-nia kolega sira prontu haksoit sai,” nia dehan.
Diretor Nasionál Emprego Exteriór, Filomeno Soares, hateten akontesimentu foin daudaun akontese to’o virál iha mídia ne’e kona-ba rejistu ba juventude sira-ne’ebé ramata ona kursu lian Korea fulan neen, ne’ebé mak hakarak mai rejistu hodi tuir kursu lian Korea iha SEFOPE.
“Foin lalais, ita iha sentru 10 ne’ebé fó formasaun lian korea iha Díli laran. Sira oferese sira-nia ema mai hotu, entaun iha momentu ne’ebá ita-nia oráriu ladun di’ak ba sira, ho ne’e sira mai hotu. Tanba ne’e, hetan situasaun sena no dudu malu, balun hetan kanek, ho akontesimentu ne’e ami sente triste. Ho ida-ne’e, iha lorokraik ami halo kedas asaun taka prosesu rejistu temporária, nune’e ami halo reuniaun ho Diretór Sentru Formasaun sira no reprezentante Governu Korea iha ne’e, ami halo oráriu kada sentru ida-idak mai rejistu, nune’e ikus mai buat hotu la’o di’ak,” nia esplika.
Dirasaun Nasionál Empregu Exteriór mós hetan kooperasaun ho Polísia Nasionál, Eskuadra Becora no Seguransa Sívil atu bele fó apoia ba prosesu rejistrasaun.
Kona-ba kandidatu traballadór Korea, husu SEFOPE liuhosi DNEE atu kria sistema rejistu iha sentru formasaun ne’e DNEE iha planu ba ida-ne’e, nune’e ba futuru bele kria ona sistema ne’e atu involve sentru formasaun.
“Iha tinan oin, ita sei ko’alia ho reprezentante Governu Korea iha ne’e atu bele buka mekanizmu no dalan ne’ebé di’ak ba prosesu rejistu, nune’e ba futuru labele akontese tan problema hanesan,” nia dehan.
Tuir nia, rejistu ne’e loloos bele hala’o iha edifísiu DNEE maibé preparasaun ba atendimentu prosesu rejistu ne’e tenke di’ak, nune’e bele hakat ba iha sentru formasaun sira.
Aleinde ne’e, presiza prepara rekursu no fó formasaun ba ema ne’ebé atu atende rejistu, tanba formuláriu rejistu mai hosi Korea entaun Korea presiza esplika, atu nune’e sira iha koñesimentu kona-ba prosesu rejistu iha formuláriu ne’e,” nia hateten.
Tanba prosesu rejistu ne’e, tuir kritériu Governu Korea fó katak primeiru tenke tuir formasaun lian Korea, estandar formasaun to’o fulan neen hafoin tuir teste, sé mak manán mak DNEE aplika ba servisu iha Korea.
Entretantu, prosesu rejistu ne’e hahú iha 02 sei ramata iha loron 10 fulan junu tinan 2022, nune’e karik la hotu bele aumenta loron ida no rua, nune’e bele finaliza ba prosesu rejistu.
Tuir dadus hosi Diretor Nasionál Emprego Exteriór, Filomeno Soares, katak hahú hosi janeiru to’o junu tinan ne’e, DNEE manda ona kandidatu traballdór kuaze 5,95 ba servisu iha Korea.
Jornalista : Nelia Fernandes
Editór : Cancio Ximenes
