Labarik 48% sei iha liña probeza nia-laran
DILI, 10 juñu 2022 (TATOLI)—Diretór Nasionál Estatístika Ministériu Finansa (MF), Silvino dos Santos, hateten tuir dadus ne’ebé parte INDDICA ho Dirasaun Estatístika halo análiza ba labarik iha Timor-Leste 48% mak sei iha liña probreza nia-laran.
“Labarik iha Timor-Leste 48% mak sei iha liña probreza nia-laran,” Silvino dos Santos hateten iha nia intervensaun ba Diretór Nasionál, Silvino dos Santos, hateten iha nia diskursu ba diseminasaun análiza situasaun feto no labarik feto iha TL, iha salaun City8, Has Laran, Dili, sesta ne’e.
Labarik sira ho idade entre 0 no 17 mak hamutuk 44% no husi populasaun Timor-Leste iha 2021. Sira reprezenta besik metade hosi utilizadór potensiál sira iha setór oioin, no sira tenke iha sentru polítika, programa no orsamentu maske iha tendénsia pozitivu, maibé monitoriza labarik sira-nian nafatin aas tebes.
Hosi 48%, labarik sira ho idade seidauk to’o tinan lima ka tinan lima mai kraik mak raes-badak númeru ida aas liu iha mundu, ho impaktu ne’ebé mak estraga labarik sira-nia dezenvolvimentu fíziku no mentál no iha nasaun nia ekonómia.
Menus liu metade hosi ema kompara ho tinan tolu ne’e iha progresu iha alfabetizasaun, sosiál no aprendizajen. Importante tebes atu investe iha dezenvolvimentu labarik kiik, ezemplu liuhosi hadi’a prátika inan-aman nian no habelar asesu ba eskola sedu sira.
Prezidente INDDICA, Dinorah Granadeiro, hateten tuir dadus ne’ebé mak INDDICA iha 48% hosi labarik sira sei moris iha má nutrisaun.
“Ida-ne’e sai evidénsia ida ba Estadu oinsá kombate kiak maibé mekanizmu no situasaun oinsá mak redús problema refere. Ita labele halakon dala ida maibé presiza la’o neineik no ba beibeik, sei normaliza mak presiza servisu hamutuk ho ministériu elevante sira hanesan Ministériu Solidariedade Sosiál no Inkluzaun (MSSI), Ministériu Justisa (MJ), Ministériu Edukasaun Juventude no Desportu (MEJD), Ministériu Saúde (MS) mak sai xave ba asuntu labarik nian,” Dinorah hateten.
Tanba ne’e, Dinorah husu ba ministériu sira presiza atu monitoriza no aloka orsamentu ba labarik sira-nia nesesidade.
Jornalista : Osória Marques
Editór : Cancio Ximenes
