COVALIMA, 13 juñu 2022 (TATOLI)–Konsellu Veteranu munisipiu Covalima liuhosi ekipa verifikadór sira finaliza ona verifika dadus kandidatu veteranu ne’ebe rejistadu iha 2009 iha suku Beco, postu administrativu Suai Vila, munisípiu Covalima.\
“Ekipa verifikasaun hosi nasionál finaliza ona halo verifikasaun ba dadus kandidatu veteranu ne’ebé rejista iha tinan 2009 iha suku Beco, postu Suai Vila, munisípiu Covalima no ha’u halo de’it monitorizasaun,” Prezidente Konselu Veteranu munisípiu Covalima, Osório Soares “Mausoko”, relata ba Agência Tatoli iha nia knar fatin, Tabako-lot, segunda ne’e.
Tuir dadus, kandidatu veteranu sira iha suku Beco ne’ebé sei moris no mate ne’e hamutuk 449. Hosi númeru ne’e, sidadaun ne’ebé atu sai veteranu grau 8-14, depende ba sidadaun konta sira- nia istória partipasaun iha luta no desizaun ne’e foti hosi nasionál.
Hosi dadus kandidatu veteranu sira-ne’e, nia la garante sidadaun hotu sai veteranu bainhira partisipasaun funu loron ida kategoria grau 8-15, nasaun bele bankarota.
“Ita valoriza de’it bainhira nia partisipasaun luta loron ida de’it, ita tau ida-ne’e. Ita la garante hotu-hotu sai veteran,” nia dehan.
Tuir planu, ekipa verifikasaun dadus sei halo enseramentu verifikasaun dadus kandidatu veteranu ne’ebé rejistadu iha 2009 iha suku Debos, postu Suai Vila, munisípiu Covalima ne’e falta de’it iha suku Labarai, Camanasa, Suai Loro no ikus liu iha suku Debos.
Enkuantu ekipa verifikasaun dadus finaliza ona halo verifikasaun dadus ba kandidatu veteranu sira iha postu administrativu Fatululik, Fatumea, Maucatar, Zumalai, Tilomar no Zumalai ho kandidatu veteranu hamutuk na’in-9,963.
Jornalista : Celestina Teles
Editór : Cancio Ximenes
