VIQUEQUE, 14 juñu 2022 (TATOLI)-–Ministériu Administrasaun Estatál (MAE) koopera ho United Nations Development Programme (UNDP) hosi kapasita feto foin-sa’e sira iha prosesu dezenvolvimentu lokál iha munisípiu Viqueque.
“Ohin UNDP hamutuk ho MAE fó kasitasaun ba ita-nia feto foin-sa’e no grupu vulnerável sira iha prosesu dezenvolvimentu lokál. Projetu ne’e realiza tanba UNDP koopera hamutuk ho MAE,” Reprezentante UNDP ba projetu dezentralizasaun munisipál, Emiliana Soares, hateten ba Agência Tatoli, iha Salaun Franciscana, Beloi, tersa ne’e.
Notísia relevante: MAE fó asisténsia téknika ba autoridade munisípiu Viqueque
Atividade ne’e realiza ho tema ‘Hakbiit feto no foin-sa’e sira iha dezenvolvimentu lokál’.
“Feto foin-sa’e sira bele hatene ita-boot sira-nia papel iha prosesu dezenvolvimentu. Ami mós agradese disponibilidade hodi partisipa atividade ida-ne’e”. nia akresenta.
Iha fatin hanesan, Diretora Nasionál Planeamentu no Avaliasaun hosi MAE, Olávia Marques, agradese ba UNDP ne’ebé halo serbisu kooperasaun di’ak tanba iha interese boot hodi serbisu hamutuk ho MAE.
“UNDP ho vontade di’ak hodi realiza atividade ne’e durante loron-rua hodi hasa’e koñesimentu feto foin-sa’e sira-nia iha prosesu dezenvolvimentu lokál,” nia tenik.
Iha biban ne’e, Sekretáriu munisípiu Viqueque, José da Costa de Sousa, husu ba feto foin-sa’e atu aproveita atividade ne’e ho di’ak hodi apreende matéria ruma ne’ebé parte rua aprezenta nune’e bele hasa’e ba prosesu dezenvolvimentu lokál.
“Ha’u husu maluk foin-sa’e tenki aproveita di’ak hodi simu matéria ne’ebé parte UNDP no MAE aprezenta ba ita-boot sira. Ha’u mós agradese ba parte rua ne’ebé fó kapasitasaun ba ami-nia foin-sa’e sira iha munisípiu Viqueque,” nia realsa.
Atividade ne’e partisipa hosi feto foin-sa’e hamutuk na’in-25 no realiza durante loron rua, hahú 13 to’o 14 juñu.
Jornalista : Vitorino Lopes da Costa
Editora : Julia Chatarina
