iklan

COVALIMA, MUNISÍPIU

Servisu Agrikultura sei reabilita bee-dalan distribui bee ba natar iha Tilomar

Servisu Agrikultura sei reabilita bee-dalan distribui bee ba natar iha Tilomar

Diretòr Servisu Agrikultura Munisípiu Covalima, Domingos Gusmão. Imajen Tatoli/Celestina Teles.

COVALIMA, 14 juñu 2022 (TATOLI)–Servisu Agrikultura Munisípiu Covalima iha planu sei konstrui no reabilita bee-dalan distribui bee ba komunidade atu halai natar iha postu administrativu Tilomar, munisípiu Covalima.

Notísia Relevante: Natar iha Tilomar abandona tanba bee laek

“Klaru ita iha duni planu no iha hanoin atu halo konstrusan no reabilitasaun ba bee-dalan distribui bee ba natar, maibé ho fazeadamente. Iha tinan ida, Governu labele responde dala ida tanba tinan oin sei haree Maukola, postu administrative Zumalai no iha Tafara seidauk hahú. Entaun, iha parte Salele, ita seidauk ko’alia maske iha duni planu atu reabilita,” Diretór Servisu Agrikultura Munisípiu Covalima (SAMC), Domingos Gusmão, informa ba Agência Tatoli liuhosi telefónika, tersa ne’e.

Realidade hatudu komunidade iha postu Tilomar la halai natar tanba fonte bee hosi parte Damuk mai iha Tilomar, área Salele ne’e bee maran entaun komunidade labele halai natar no labele hasa’e produsaun hare kulit hahú hosi 2014 to’o ohin loron.

“Komunide balun mak halai natar ektare ida-rua. Maioria komunidade iha Tilomar la halai natar tanba bee laiha. Konstrui irrigasaun prosesu la’o hela. Ha’u lahatene Salele nian seidauk maibé Governu konstrui ho fazeadamente tanba Governu haree buat hotu no ohin labele realiza kedas,” nia informa.

Administradór postu Administrativu Tilomar, Benedito Maia reforsa, natar barak iha postu Tilomar abandona la’ós komunidade mak baruk-teen atu servisu, maibé bee laiha atu distribui ba natar.

Autoridade postu iha responsabilidade atu haree problema ne’e hodi hato’o proposta ba nasionál  no ONG sira, maibé to’o ohin loron seidauk iha resposta.

“Ha’u rasik hato’o ona proposta ba nasionál no ONG sira dala barak ona, maibe seidauk iha rezultadu. Komunidade Tilomar, ita bele dehan natar ne’e zero,” nia dehan.

Maske povu Tilomar la hasa’e produsaun hare kulit maibé komunidade foku de’it kuda batar, foremungu, fore-rai no seluk tán.

Postu administrativu Tilomar kompostu hosi suku Maudemo iha aldeia Besac-oan, Ai-taman, Sadahur, Faularan, Caicoli, Onularan no Koitau, suku Beiseuc iha ladeia Baer, Foho-lulik, Niquir, Wala, Fatuk-metan, Maubesi no Wetaba.

Suku Casabauk iha aldeia Colo-ama, Cawa Uman no Tabolo no suku Lalawa iha aldeia Talaeduk, Halimea, Kota Foun, Bitis, Salele-boot no Ai-oan.

Jornalista : Celestina Teles

Editór      : Cancio Ximenes

iklan
iklan

Leave a Reply

iklan
error: Content is protected !!