DILI, 15 juñu 2022 (TATOLI)–Aeroportu no Navegasaun Aérea Timor-Leste, Empreza Públika (ANATL, E.P) iha tempu besik sei loke vaga bolsa estudu neen ba públiku ba tinan akadémiku 2020-2021, atu ba eskola iha Indonézia iha área jestaun operasionál no firefighting ka bombeiru.
Prezidente Konsellu Administrasaun ANATL, E.P, José Trindade da Cruz Pinto, hateten, ANATL, E.P iha responsabilidade boot atu fó atendimentu no servisu di’ak ba públiku, liuliu ba pasajeiru sira ne’ebé mak halo movimentu iha aeroportu Timor ho transporte aereu.
“Hanesan jestór, aleinde halo modernizasaun ba ekipamentu sira iha aeroportu, presiza hadi’a no kapasita mós rekursu umanu ba funsionáriu sira. Ita konsidera katak kapasitasaun rekursu umanu buat ida importante tebes. Iha aeroportu ne’e ami halo ona kursu badak ba funsionáriu sira, kapasita rekursu umanu no ita halo ne’e atu apoiu sira atubele halo serbisu operasaun ba ekipamentu sira hodi bele fó atendimentu di’ak liután ba públiku,” José Trindade informa liuhosi konferénsia imprensa iha salaun VIP Aeroportu Internasionál Prezidente Nicolau Lobato, Comoro, kuarta ne’e.
Notísia relevante: Rekerrente bolsa estudu ba veteranu nia oan 1,548 iha faze ajustamentu
Orsamentu ba bolsa estudu neen ne’e hosi Fundu Dezenvolvimentu Kapitál Umanu (FDCH, sigla portugés) ho montante $31.342.
“Daudaun ne’e VIII Governu Konstitusionál prepara hela prosesu konstrusaun aeroportu boot ne’ebé sei instala ho ekipamentu modernu no tuir padraun internasionál, ho nune’e ANATL, E.P sente iha obrigasaun hodi prepara rekursu umanu sira ho kualifikadu atubele halo serbisu operasionál hodi fó atendimentu di’ak no kualidade atu garante seguransa ba servisu aviasaun iha aeroportu,” Prezidente Konsellu Administrasaun ANATL, E.P informa.
Nune’e, ANATL, E.P sei fó sai vaga ne’e, ho planu atu ba kontinua estudu iha área jestaun operasionál iha haat, kompostu hosi bolseiru rua iha operasionál no rua iha aviation security, hafoin aumenta tan bolseiru rua iha área firefighting.
Bolseiru neen ne’ebé atu ba eskola iha Indonézia sei estuda iha Politeknik Penerbangan Surabaya (POLTEKBAN) no Sekolah Tinggi Penerbangan Indonesia (STPI) Curug iha Jakarta.
“Aplikante sira sei konkorre no sei halo kontratu ho ANATL, E.P, nune’e bainhira eskola ramata sira sei sai funsionáriu públiku hodi reforsa serbisu iha aeroportu Timor-Leste,” nia dehan.
Antes ne’e, ANATL, E.P oferese ona bolsa estudu neen ne’ebé daudaun ne’e estuda hela iha POLITEKBAN Surabaya.
Tinan ne’e, kontinua hetan tan bolsa estudu neen, daudaun iha faze preparasaun atu loke vaga, ne’ebé sei asesu liuhosi aeroportu, FDCH no Ministériu Ensinu Superiór Siénsia no Kultura (MESSK).
“Oportunidade ne’e sei ba disponível ba jerasaun foun ne’ebé iha interese bele hatama dokumentu, hafoin maka sei halo selesaun,” nia fó hanoin.
Jornalista : Tomé Amado
Editora : Julia Chatarina
