OÉ-CUSSE, 15 juñu 2022 (TATOLI) – Xefe suku Usitaqueno, sub-rejiaun Oésilo, Rejiaun Administrativa Espesiál Oé-Cusse Ambeno (RAEOA), Fransisco Elo, sujere ba Ministériu Agrikultura no Peska (MAP) atu kria merkadu ida kona-ba produtu ne’ebé grupu benefisiáriu sira prodús ona iha projetu Hasa’e Produtividade Agrikultura Sustentavél (HAPAS) nune’e bele iha kompetisaun entre grupu sira.
Xefe suku Usitaqueno, Fransisco Elo, hatete, grupu benefisiáriu lima iha suku Usitaqueno envolve direita iha fundu projetu HAPAS, hodi ezekuta planu prioridade rua ba setór agrikultura, iha faze primeiru grupu rua dezenvolve floresta kuda ai-oan foka liu ba sabraka iha to’os grupu, no faze segundu grupu tolu, dezenvolve agro-floresta, kuda lís-mean no mutin.
Nia informa, grupu rua daudaun ne’e dezenvolve floresta, iha ona rezultadu tanba sabraka kuda iha 2018 agora boot ona, balu iha ona fuan balu seidauk, nune’e persiza tinan rua tolu bele fa’an ona iha merkadu.
“Ha’u observa direita, kada grupu envolve membru na’in-30, konsege halo to’os kuda sabaraka ne’e, ida kada membru sira-nia toos, ne’e orgullu boot ba projetu ne’e, balu kahur ho kafé, mahoni, kamí, maibé ba sabraka ne’e maioria kuda hotu, iha tinan tolu mai bele fa’an ona no nia rendimentu sei sufisiente tanba haree ba volume to’os luan, tanba kada membru ida, nia kuda kuaze ai-hun 50,” nia orgullu.
Kuandu kona-ba grupu agro-floresta ne’e, iha grupu tolu mak kuda de’it lís-mean no mutin, ne’e maioria membru sira dezenvolve de’it liis, nia rezultadu kada tinan aumenta beibeik, tanba iha ne’ebá poténsia ba produtu ne’e.
Maibé nia merkadu maka seidauk iha, só faan de’it iha merkadu tradisionál sira, maibé atu distribui ba loja no empreza to’o agora seidauk iha, maibé haree ba rezultadu ne’ebé grupu sira prodús volume boot.
Tanba projetu HAPAS ne’e iha MAP nia okos, entaun ita espera iha futuru bele kria merkadu ida kona-bá lís, tanba grupu sira iha inisiativa boot atu dezenvolve produtu ne’e, inklui produtu sabraka.
“Tan ne’e, ha’u sujere ba Governu liuhosi Ministériu Agrikultura no Peska (MAP), oinsá bele kria merkadu ida grupu benefisiáriu sira-ne’e, kona-ba produsaun lís no sabraka, tanba iha ha’u-nia suku, ema ida bele kuda lís to’o kilógrama 400, sabraka membru sira kuda hotu, aban bainrua atu lori ba-ne’ebé, grupu lima iha Usitaqueno esforsu ona, maibé nia merkadu ne’e maka seidauk ida,” nia sujere.
Nia informa, projetu ne’e hahú lansamentu iha sub-rejiaun Oésilo iha 2017, maibé implementasaun ba distribuisaun fini nian iha 2018.
Notísia relevante: Jestór Oésilo husu MAP fasilita téknika-jestaun ba grupu benefisiáriu projetu HAPAS
Jornalista : Abílio Elo Nini
Editór : Evaristo Soares Martins
