DILI, 17 juñu 2022 (TATOLI)–Governu liuhosi Ministériu Turizmu Komérsiu no Indústria (MTKI), sesta ne’e, ofisialmente halo lansamentu distribuisaun Cesta Bázika faze daruak iha aldeia Baia Leste, suku Comoro, postu administrativu Don Aleixo, munisípiu Dili.
Ministru Turizmu Komérsiu no Indústria, José Lucas do Carmo da Silva, hateten, programa Cesta Bázika hanesan modelu ida hosi planu rekuperasaun ekonómika, ne’ebé hala’o ona iha tinan 2021 no agora kontinua faze daruak.
“Objetivu prinsipál Cesta Bázika daruak maka atu haforsa ekonomia rai-laran no fortifika alimentár. Programa ne’e realiza tanba hetan rekomendasaun hosi entidade barak, liuliu populasaun rasik, aleinde haree ba esperiénsia iha implementasaun dahuluk no estudu lubuk katak programa ne’e iha impaktu pozitivu ba produsaun produtu agríkola rai-laran, liuliu foos, fore, no seluk tan, ne’ebé ninia kuantidade produsaun sa’e,” Ministru relata iha ámbitu lansamentu.
Notísia relevante: Aban, MTKI halo lansamentu Cesta Bázika faze daruak iha Dili
Programa nasionál ne’e la’o ho baze legál ne’ebé prevee iha dekretu-lei númeru 10/2022, 4 marsu, ne’ebé hamutuk ho diploma konjunta lubuk, liuhosi sekretariadu tékniku.
Haree ba produsaun agíkola sa’e, maka programa ba faze daruak tau importánsia ba produtu rai-laran, balun de’it maka importa tanba produtu rai-laran la sufisiente.
Produtu importasaun mak hanesan masin-midar, ijene femenina, mina-sona, no deterjente, enkuantu produtu sira iha Cesta Bázika maka produtu alimentár kompostu hosi karbohidratu, proteina no produtu ijiene pesoál inklui produtu ijiene femenina.
“Produtu karbohidratu mak hanesan foos, fehuk, produtu proteina maka manu-tolun, koto no fore, produtu vitamina maka modo-tahan, repollu, brinjela, senoura, tomate, lakeru no aifuan,” nia akresenta.
Nune’e, governante ne’e apela ba parte hotu atu iha konsiénsia kontribui no apoia másima ba implementasaun hodi prosesu distribuisaun la’o ho di’ak, tanba programa ne’e la’ós Governu nian de’it maibé ema hotu nia responsabilidade.
“Mekanizmu hanesan nafatin ho distribuisaun ida uluk ne’e, kada ema hetan sasán ho montante $50,” nia tenik.
Notísia relevante: Governu ofisialmente enserra distribuisaun Cesta Bázika
Iha biban hanesan, Adjuntu Prezidente Autoridade Munisípiu (PAM) Dili, António Moniz Clau, hateten, hanesan uma-nain ba Dili, hato’o apresiasaun ba programa Cesta Bázika tanba hili Dili nu’udar fatin lansamentu dahuluk.
“VIII Governu Konstitusionál mai ho nia polítika ida atu fó konsiderasaun ba nia sidadaun sira, maski oitoan maibé beibeik no populasaun munisípiu Dili hetan apoia ida-ne’e ba dala-rua ona,” nia apresia.
Adjuntu PAM Dili husu ba benefisiáriu sira, atu labele haree hosi kuantidade ai-han ne’ebé simu, maibé haree hosi Governu nia domin, oinsá nafatin tau sidadaun sira hanesan.
Totál benefisiária iha aldeia Baia Leste hamutuk 757 hosi uma-kain 175, suku Comoro 17.233,
Enkuantu, benefisiáriu Cesta Bázika faze daruak iha territóriu nasionál millaun 1,4, ho orsamentu hamutuk millaun $80.
Atividade ne’e akompaña hosi Komisaun Antí-Korrupsaun (CAC, sigla portugés), Provedoria Direitu Umanu no Justisa (PDHJ, sigla portugés).
Molok entrega produtu ba benefisiáriu sira, ekipa Autoridade Inspesaun no Fiskalizasaun Atividade Ekonómika, Sanitária no Alimentár, Institutu Públiku (AIFAESA, IP) halo uluk verifikasaun ba produtu sira.
Jornalista : Antónia Gusmão
Editora : Julia Chatarina
