DILI, 17 juñu 2022 (TATOLI)—Ministériu Ensinu superiór Siensia no Kultura (MESSK) hato’o proposta alterasaun dekretu-lei númeru 8/2010 19 maiu kona-ba rejime estabelesimentu ensinu superiór ba Konsellu Ministru no hetan ona aprovasaun tanba lejizlasaun ne’e vigora ona desde tinan-10.
Tanba ne’e, tuir Ministru Ensinu Superiór Siensia no Kultura, Longuinhos dos Santos, presiza halo alterasaun ba lei ne’e rasik ho objetivu atu halo atualizasaun ka ajustamentu, liuliu ba situasaun atuál ne’ebé iha no futuru ba área ensinu superiór nasionál.
“Intensaun hosi alterasaun dekretu-lei ne’e atu hadi’a kualidade no reforsa ensinu superiór sira atubele iha liberdade, organiza-an di’ak no iha sustentabilidade. Bainhira rejime jurídiku ensinu superior ne’e halo revizaun iha kontíudu balun mantein nafatin iha dekretu-lei númeru 8/2010,” Ministru informa ba Agência Tatoli, iha ninia knaar fatin, Colmera, sesta ne’e.
Notísia relevante: Governu aprova rejime jurídiku estabelesimentu ensinu superiór
Aleinde ne’e, MESSK konsidera presiza halo mudansa no inovasaun ba konsolidasaun konseitu bináriu ba sistema ensinu superiór nian, ne’ebé fahe ba rua hanesan ensinu superiór universitáriu no tékniku ne’ebé hatuur iha artigu 5.
Nune’e mós, kona-ba rekoñesimentu asosiativu estudantíl ne’ebé fó dalan atu legaliza sira-nia asosiasaun ne’ebé mak kria iha Instituisaun Ensinu Superiór Públiku no Privada (IESPP) sira ne’ebé hatuur iha artigu 12.
“Hosi alterasaun ka revizaun dekretu-lei ne’e rasik, obriga Instituisaun Ensinu Superiór Públiku no Privada sira atu fó apoiu ba estudante sira hodi bele asesu iha merkadu traballu ne’ebé hatuur iha artigu 15. Ho nune’e, bele kria provedór estudantíl ne’ebé hatuur iha artigu 16,” governante ne’e esplika.
Parte ministériu buka atu hadi’a regra balun hodi halo transferénsia ba IESPP sira, ne’ebé polítika no planu ne’e rasik MESSK hatuur iha artigu 22, 23, 24, maibé ministériu kria filafali inovasaun iha dekretu-lei ne’e liga liu ba rejime jurídiku ida kona-ba oinsá atu selu multa.
“Ita sei fó biban ka kompeténsia maka’as liu ba fiskalizasaun no inspesaun ba membru Governu sira, liu-liu ne’ebé maka tutela ba MESSK atu reforsa importánsia ba nesesidade Instituisaun Ensinu Superiór Públiku no Privada sira hodi bele kumpre regra ka lei ne’ebé vigór ona ne’ebé hatuur iha artigu 64 to’o 69,” Ministru informa.
IESPP sira kuandu Governu seidauk fó lisensa operasionál ba sira atu loke kursu foun ka realiza graduasaun, maka sira sei kona multa, maibé modelu multa ne’e sei hatuur iha diploma ministeriál.
Jornalista : Tomé Amado
Editora : Julia Chatarina
