HEADLINE, INKLUZAUN SOSIÁL, NASIONÁL

AEMTL realiza formasaun empreendedorizmu durante loron-lima

AEMTL realiza formasaun empreendedorizmu durante loron-lima

AEMTL realiza formasaun empreendedorizmu, iha Akait, segunda (20/06). Imajen Tatoli/Cidália Fátima

DILI, 20 juñu 2022 (TATOLI)–Asosiasaun Emprezariál Muller Timor-Leste (AEMTL) serbisu hamutuk ho International Labour Organization (ILO) no Kámara Komérsiu Indústria Timor-Leste (CCI-TL, sigla portugés), segunda ne’e, hodi realiza formasaun empreendedorizmu durante loron-lima.

Atividade ne’e ho tema ‘kore-an hosi violénsia no dependénsia ho empreendedorizmu’ no partisipa hosi organizasaun sira hanesan Asisténsia Legál ba Feto no Labarik (ALFeLa), grupu LGBT, Coliation for Diversity and Action (CODIVA), Rede Feto no FOKUPES.

Prezidente AEMTL, Hergui Luna Fernandes Alves, hateten formasaun ne’e hanesan programa spotlight ne’ebé iha akordu ho CCI-TL no ILO.

“Tinan kotuk realiza ona faze dahuluk, agora faze daruak, no sei kontinua.  Objetivu hosi programa spotlight maka hamenus violénsia bazeia ba jéneru liuhosi empreendedorizmu, entaun iha objetivu ida-ne’e maka sei fó treinamentu ba grupu benefisiáriu sira,” Prezidente AEMTL hateten hafoin abertura formasaun iha salaun enkontru AEMTL, Akait.

Notísia relevante: MTKI no AEMTL koordena lansa turizmu patrimóniu kulturál

Fundu hodi realiza atividade ne’e hosi Uniaun Europeia ho montante $50.000 resin, ne’ebé mak fó liuhosi ILO ho kooperasaun CCI-TL, ba formasaun treinadór sira iha munisípiu Dili, Ermera, Bobonaro no Viqueque, enkuantu formadór sira mai hosi CCI-TL, AEMTL no Institutu Apoiu Dezenvolvimentu Emprezariál (IADE).

“Treinamentu ne’e inkluzivu atu ema hotu iha opsaun atu hili dalan empreendedorizmu ne’e hanesan opsaun ida iha sira-nia vida no iha independénsia ekonomikamente. Ida-ne’e knaar AEMTL tanba ami-nia foku maka empodera feto sira atu iha rendimentu rasik no dependénsia ekonomikamente tanba atu hapara violénsia no ema idaidak iha nia forsa ekonomia rasik,” nia tenik.

Entretantu, hafoin ramata atividade, benefisiáriu sira kria planu negósiu rasik no implementa.

Matéria formasaun hosi ILO ho módulu get ahead, ne’ebé aplika iha mundu tomak atubele empodera feto iha ekonomia no feto iha empreendedorizmu.

“Ha’u hein atividade ne’e bele la’o ho di’ak no ema sira ne’ebé partisipa bele aproveita matéria hotu hosi get ahead ne’e, tanba ita hotu hatene maski ita ohin hasoru difikuldade ne’ebé la hanesan maibé ita sei iha esperansa katak loron aban sei iha mudansa kuandu ita hakarak,” nia otimista.

Jornalista : Antónia Gusmão

Editora     : Julia Chatarina

iklan
iklan

Leave a Reply

iklan
error: Content is protected !!