iklan

COVALIMA, POLÍTIKA

Komisaun Verifikadór halo verfikasaun dadus ba kandidatu veteranu iha Suai Loro

Komisaun Verifikadór halo verfikasaun dadus ba kandidatu veteranu iha Suai Loro

Kandidatu veteranu iha suku Suai Loro. Imajen Tatoli/Celestina Teles.

COVALIMA, 20 juñu 2022 (TATOLI)—Prezidente ekipa verifikasaun dadus Veteranu, Francisco Doutel Sarmento “Lamesak”, informa Komisaun verifikadór daudaun ne’e halo verfikasaun dadus ba kandidatu veteranu ne’ebé rejistadu 2009 iha aldeia Sukabi Laran, suku Suai Loro, postu administrativu Suai Vila, munisípiu Covalima.

Notísia Relevante: Riak Leman monitoriza ekipa verifikasaun dadus kandidatu veteranu iha Covalima

“Hafoin komisaun verifikadór dadus kandidatu veteranu finaliza   verifika dadus kandidatu veteranu iha suku Beco no Labarai, ohin tama ona iha suku Suai Loro, postu administrativu Suai Vila no kandidatu veteranu na’in-336 halo ona juramentu iha sábadu (18/6). Ohin, segunda (20/06) ne’e hahú halo ona entrevista ba kandidatu veteranu sira-ne’e,” Francisco Doutel Sarmento “Lamesak” hato’o ba jornalista sira, iha aldeia Sukabi Laran, suku Suai Loro, segunda ne’e.

Ho nune’e, nia parte seidauk bele fó sai dadus kandidatu veteranu iha munisípiu Covalima na’in-hira mak finaliza ona halo verifikasaun no hira mak seidauk, tanba agora sei iha prosesu verifikasaun dadus kandidatu veteran rejistadu 2009 no hafoin ramata mak sei fó dadus loloos ba públiku.

“Komisaun finaliza ona halo verifikasaun mak ita foin bele hatene loloos iha postu administrativu hitu (7) hodi bele hatene totál verifikadu na’in hira mak mate no moris ema na’in hira, hafoin aprova ba grau 8-14 no grau 4-7 ne’e na’in –hira,” nia dehan.

Hafoin komisaun finaliza verfikasaun no halo avalisaun dadus ba kandidatu veteranu no Ministériu Asuntu Kombatente Libertasaun Nasionál fó sai rezultadu durante komisaun halo verifikasaun dadus ba kandidatu veteranu sira.

Nia informa, maske durante komisaun halo verifikasaun dadus ba kandidatu veteranu ne’ebé mak la kongese partisipa maibé sei fó oportunidade ba sira halo verifikasaun konsentra iha nasionál.

Antes ne’e, ekipa komisaun verifikasaun dadus veteranu finaliza ona verifikasaun dadus iha postu administrativu sira hanesan Fatululik, Fohorem, Fatumea, Tilomar no Zumalai, nune’e ekipa finaliza ona halo verifikasaun dadus kandidatu veteranu hamutuk na’in-9,963.

Jornalista : Celestina Teles

Editór       : Cancio Ximenes

iklan
iklan

Leave a Reply

iklan
error: Content is protected !!