DILI, 21 juñu 2022 (TATOLI)-Governu liu hosi Ministériu Finansa ho Programa Dezenvolvimentu Nasaun Unidu (UNDP, sigla inglés), tersa ne’e, asina nota entendimentu ka (MoU, sigla inglés) hodi kapasita funsionáriu iha nivel munisípiu ligadu ho jestaun finansa públika, liuliu kona-ba planeamentu, no aprovizionamentu.
“Asina nota entendimentu ohin ne’e sei liga liuba programa kapasitasaun ba ita-nia funsionáriu sira iha nível munisípiu, kapasitasaun área jestaun liga ba planeamentu, jestaun no aprovizionamentu,” Vise-Ministru Finansa, António Freitas, hateten iha Ministériu Finansa Aitarak-Laran, Dili.
Notísia Relevante : MAE no UNDP kapasita feto foin-sa’e iha Viqueque
Programa kapasitasaun ne’e importante atu hasa’e abilidade funsionáriu públiku iha munisípiu, nune’e Governu Konstitusionál daualu bele realiza ninia polítika kona-ba desentralizasaun.
Uniaun Europeia iha Timor-Leste maka fó apoiu ba programa ne’e, liuhosi UNDP ho ninia projetu ida naran “Haforsa Dezenvolvimentu Lokál Integradu liuhosi Harii Kapasidade Autoridade Munisipal iha Timor-Leste”, atu nune’e bele hadi’a kualidade servisu iha nivel lokál nian.
Jerente Projetu Portifólio, UNDP, Bernardino Pereira, hateten, husi MoU ne’e, UNDP sei fó apoiu Ministériu Finansa atu kostumiza módulu Jestaun Finansa Públika nian ne’ebé eziste ba iha kontestu munisipál no tradús módulu sira ba iha formatu dijitál ne’ebé sei sai mós na’in iha plataforma no estudu ne’e.
Nune’e mós Xefe Kooperasaun Delegasaun Uniaun Europeia nian iha Timor-Leste, Ramos Reigada, hateten, Uniaun Europeia (UE) ninia apoiu ba prosesu desentralizasaun no deskonsentrasaun iha Timor-Leste korresponde ba totál millaun $15 ka besik millaun $17, no fundu sira ne’e kuaze ba diretamente konta tezouru Timor-oan nian (euro millaun € 11.25 ka millaun € 12 iha apoiu orsamentu direta.
“Enkuantu euro millaun € 3.25 ka millaun € 3.5 ba apoiu komplementár ne’ebé implementadu hosi UNDP millaun $0,4,” nia dehan.
“Inisiativa ne’e sei benefisia boot ba iha abordajen e-learning, ne’ebé sei permite funsionáriu públiku sira hodi asesu ba formasaun espesializadu tuir sira-nia ajenda rasik no faze formasaun nian,” Ramón Reigada, hateten.
Jornalista : Arminda Fonseca
Editór : Agapito dos Santos
