iklan

EDUKASAUN, HEADLINE

Akadémiku konsidera Timor-Leste laiha kondisaun ba joven atu serbisu

Akadémiku konsidera Timor-Leste laiha kondisaun ba joven atu serbisu

Magnífiku Reitór UNPAZ, Adolmando Soares Amaral. Imajen TATOLI/Egas Cristovão

DILI, 22 juñu 2022 (TATOLI)–Reitór Universidade da Paz (UNPAZ), Adolmando Soares Amaral, konsidera traballadór timor-oan barak ho idade produtivu kontinua sai ba buka serbisu iha ema-nia rain tanba Governu laiha planu atu kria kondisaun iha Timor-Leste hodi loke kampu traballu ba joven sira atu serbisu.

“Ita hakarak joven sira halai hotu ba serbisu iha ema-nia rain, maski ho serbisu ne’ebé la merese, tanba ne’e ita-nia Governu to’o agora seidauk kria kondisaun di’ak ida hodi solusiona problema juventude sira nian. Tanba ne’e sira tenke sai bá serbisu iha rai-li’ur hodi ajuda nesesidade família nian,” Akadémiku ne’e hateten ba Agência Tatoli, iha ninia knaar fatin, kuarta ne’e.

Notísia relevante: SEFOPE haruka tan traballadór timor-oan 87 serbisu iha Koreia Súl

Nia mós nota katak líder ka jerasaun antigu sira sempre hateten iha diskursu sira katak ema sira ne’ebé iha futuru atu kontinua estafeta nasaun no Estadu Timor ne’e maka jerasaun foun sira.

“Maibé ida-ne’e retórika de’it, realidade kondisaun Governu seidauk prepara ba jerasaun foun sira iha futuru. Ha’u la hatene Governu Timor-Leste ninia sentimentu kuandu haree joven sira halai sai hotu hodi bá serbisu iha ema-nia rain ne’e oinsá,” nia tenik.

Nia dehan, loloos Governu tenke kria ona kondisaun hodi prepara joven sira iha formasaun formál no informál atu bainhira sira bá serbisu iha ema-nia rain, bele kria ona kondisaun hodi halo kooperasaun ho nasaun dezenvolvidu sira hodi mai kria fábrika no indústria iha nasaun ne’e.

“Bainhira joven sira ne’e fila mai ho esperiénsia ne’ebé naton, sira bele enkaixa-an ona iha kondisaun sira ne’e. Pur enkuantu kondisaun de’it laiha ba sira bainhira sira fila mai atu ba serbisu iha ne’ebé konserteza númeru dezempregu sei aumenta ba beibeik, maibé Governu hakarak solusiona problema tenke prepara kondisaun, lori ema oituan mai loke kampu traballu iha Timor joven barak haruka sai ba li’ur hodi buka esperiénsia,” nia tenik.

Jornalista  : Tomé Amado

Editora      : Julia Chatarina

iklan
iklan

Leave a Reply

iklan
error: Content is protected !!