HNGV rejista pasiente fase-ran 22 no mate na’in-haat
DILI, 22 juñu 2022 (TATOLI)— Hahú hosi janeiru to’o maiu tinan ne’e, Hospitál Nasionál Guido Valadares (HNGV), rejista pasiente fase-ran (hemodiálise) hamutuk 22, hosi númeru ne’e mate na’in-haat.
“Ita rejista pasiente hamutuk 22, hosi númeru ne’e na’in-haat lakon vida. Nune’e, to’o ohin pasiente fase ran hamutuk 89,” Espesialista Nefrolojia Hospitál Nasionál Guido Valadares (HNGV), Gustavo do Rosario da Cruz, hateten ba Agência TATOLI iha HNGV Bidau, kuarta ne’e.
Nia dehan, na’in-haat ne’ebé lakon vida ne’e tanba mai ho kondisaun grave, nune’e médiku sira labele salva sira nia vida.
“Pasiente sira mai halo tratamentu iha ne’e, ami sempre fó korajen ba sira atu kontinua tratamentu fase ran, maibé sira husu alta no balun ba kontinua halo tratamentu tradisionál, bainhira mai fila-fali sira kondisaun grave,” nia afirma.
Tanba, Resposavél ne’e informa pasiente sira ne’ebé mak fase raan iha HNGV maioria moras ran-midar (diabetes), tensaun (hipertensaun) no moras rins ka policística.
Nune’e, Nia husu ba komunidade hakbesik-an ba sentru saúde no postu saúde sira bainhira hetan moras diabetes, hipertensaun no rins atu halo tratamentu sedu.
Mákina fase-ran sufisiente hela tanba iha HNGV hamutuk 12 no funsiona di’ak tebes inklui medikamentu mós laiha problema.
“Kona-ba profisionál Saúde ita sufisiente tanba ita iha epesialista timoroan na’in-tolu, Kubanu ida inklui Enfermeira sira ne’ebé mak treinadu hodi atende ba pasiente fase-raan,” nia afirma.
Jornalista : Felicidade Ximenes
Editór : Florecio Miranda Ximenes
