PNDS fó formasaun padraun konstrusaun ba tékniku enjiñeiru iha Covalima
COVALIMA, 22 juñu 2022 (TATOLI)—Enjiñaria hosi Sekretária Programa Nasionál Dezenvolvimentu Suku (PNDS) fó treinamentu padraun konstrusaun ba tékniku enjiñeiru sira hosi postu administrative hitu (7) iha munisípiu Covalima.
Objetivu hosi formasaun ne’e, atu hasa’e tékniku enjiñeiru sira-nia kuñesimentu iha área tékniku nian kona-ba padraun konstrusaun molok implementa projetu sira.
“Iha formasaun ne’e, ko’alia kona-ba padraun konstrusaun durante ne’e, ami la’o liga ba liña setorál sira. PNDS iha mos padraun ne’ebe utiliza hodi implementa projetu sira-ne’ebé iha suku sira, determina no priorítiza bele implementa iha baze liu-liu infraestrutura bázika,” Enjinãria Sekretariadu PNDS Nasionál, Zelia Freitas da Conceicão, hateten ba jornalista sira, iha salaun Resto Família, kuarta ne’e.
Tanba ne’e, nia dehan, infraestrutura liña setorál hanesan drainajen, ponte, estrada, edifísiu sira, reabilitasaun sede suku, konstrusaun Uma Kbiit laek (UKL) no rezidénsia ba profesór sira.
“Ita implementa mós ba iha konstrusaun Uma Kbiit Laek (UKL) no rezidénsia profesór sira-nian depende nesesidade ne’ebe mak prioridade liu hosi ita-nia suku atu implementa programa iha suku,” nia dehan.
Iha tinan fiskal 2022 ne’e sei implementa projetu lubuk ida iha suku no molok atu implementa projetu sira presiza fó formasaun ba tékniku enjiñeiru iha área tékniku.
Formasaun ne’e hahú iha loron 21 to’o loron 23 fulan juñu ne’e no formadór sira mai hosi ekipa nasionál, ne’ebé partisipa hosi tékniku PNDS postu administrativu hitu (7) iha Covalima.
Jornalista : Celestina Teles
Editór : Cancio Ximenes
