iklan

EKONOMIA, HEADLINE

SEA no MAP asina akordu revitalizasaun no espansaun kafé

SEA no MAP asina akordu revitalizasaun no espansaun kafé

Plantasaun Kafé iha Munsípiu Ainaro, loron domingu (15/05). Imajen Tatoli/Francisco Sony

DILI, 23 juñu 2022 (TATOLI)—Sekretáriu Estadu Ambiente (SEA) no Ministériu Agrikultura no Peska (MAP), kinta ne’e, asina akordu kona-ba halo revitalizasaun no espansaun ba kafé iha munisípiu hitu.

Munisípiu sira ne’ebé sei halo revitalizasaun no espansaun kafé ne’e ba munisípiu sira ne’ebé istórikamente iha kafé hanesan Ermera, Liquiça, Aileu, Ainaro, Bobonaro, Manufahi, Manatuto.

Sekretáriu Estadu Ambiente (SEA), Demétrio do Amaral, hateten, inisiativa ne’e bazeia ba dekretu-lei númeru 27/2022 kona-ba programa renovasaun no espansaun área plantasaun kafé.

“Programa atu halo revitalizasaun ba espansaun kafé ne’e iha orsamentu hamutuk milliaun $6,4,” Sekretáriu Estadu Demétrio informa ba Agencia Tatoli, iha ninia knaar fatin, Bebora.

Notísia relevante: Kada tinan MAP prevee $500.000 halo revitalizasaun ba plantasaun

Orsamentu ne’e sei aloka ba renovasaun plantasaun kafé, ne’ebé iha dokumentu kontratu ne’e iha objetivu lima hanesan revitalizasaun kafé oan, espansaun ba kafé, kuda ai-horis ne’ebé fó mahon ba kafé, no espansaun ba plantasaun foun ne’ebé presiza ai-horis hamahon kafé, no konservasaun kafé laku-ten.

Osan millaun $6,4 sei fahe ba parte rua, SEA sei ezekuta 37% no MAP sei ezekuta 63%.

Tuir governante ne’e, atu halo espansaun ba kafé iha dokumentu inísiu hamutuk ektare 10.000 ba tinan ida-ne’e.

Iha fatin hanesan, Ministru MAP, Pedro dos Reis, hateten, alvu ba orsamentu ratifikativu ne’e sei haree liu fatin ne’ebé istórikamente sira ne’ebé antes ne’e kafé iha maibé tanba okupasaun Indonézia ema ta’a hotu no kuda fali ai-teka.

“Entaun sei hasai fali ai-teka sira ne’e hodi halo fali espansaun ba pre-kondisaun atu nune’e bele halo espansaun. Agora daudaun ita-nia kafé ne’ebé ita identifika ne’e hamutuk ektare 59.000 maibé ita identifika mós katak iha área barak mak sei fó oportunidade atu halo espansaun ba kafé,” nia tenik.

Jornalista : Arminda Fonseca

Editora     : Julia Chatarina

iklan
iklan

Leave a Reply

iklan
error: Content is protected !!