iklan

EDUKASAUN

CEPAD selebra akordu ho eskola Sacrojes-São Pedro atu prevene korrupsaun

CEPAD selebra akordu ho eskola Sacrojes-São Pedro atu prevene korrupsaun

Ilustrasaun Prevene Korrupsaun. Imajen/Espesiál.

DILI, 24 juñu 2022 (TATOLI)–Prezidente Board Sentru Estudu ba Dame no Dezenvolvimentu (CEPAD-sigla, portugés), Cipriana Pereira, hateten, ohin asina nota entendementu ho Eskola São Pedro Comoro ho Eskola Sacrojes atu aumenta koñesimentu estudante sira-nian hodi prevene no luta kontra korupsaun no asegura integridade no governasaun ida di’ak iha futuru.

“Importansia hosi CEPAD nian mak ita fó formasaun ba ita-nia estdutante sira tanba sira mak futuru lideransa ba rai ne’e nian, tanba ne’e ita hakarak ne’e liuhosi formasaun hodi bele transmite entendimentu saida mak korupasaun no oinsá halo asaun prevensaun. Nune’e, liuhosi nota ne’e bele prepara fó formasaun, atu sira rasik mak sai autór no ajente transformasaun sosiedade nian,” Cipriana hateten ba jornalista sira, hafoin selebra akordu ho eskola rua ne’e, iha Ótel Vila Verde, Dili, sesta ne’e.

Objetivu hosi selebra akordu ne’e, atu eskola rua ne’e bele servisu ho CEPAD nune’e  transmite importánsia ba prevensaun korrupsaun iha Timor-Leste.

“Ita lakohi husik estudante mak sai vítima ba aban bainrua nian no ita la’ós prepara de’it sira-nia kakutak maibé sira-nia mentalidade hotu. Tanba, estudante ida mak loron ida sai lideransa ida iha nasaun ne’e sei halo servisu ho onestidade, transparénsia, servisu ho responsabilidade, nune’e sira-nia servisu nia impaktu fó benefísiu ba ema hotu. Ida-ne’e mak objetivu hosi asina nota ne’e,” nia dehan.

Tanba ne’e, CEPAD selebra akordu ho eskola rua ne’e liuhosi programa “Hakbi’it koñesimentu estudante sira-nian ho valor integridade, disiplina no inestidade atu prevene no luta kontra korupsaun hodi asegura integridade no governasaun ida di’ak iha futuru”.

Programa ne’e ho intensaun atu esudante sira hatene saida mak korrupsaun, nia konseitu hanesan ne’ebé, impaktu ne’e saida no se la kombate agora sé mak sei sai vítima. Tanba ne’e, hahú agora implementa uluk iha eskola rua depois sei introdús iha kurrikulu edukasaun nian, nune’e estudante hotu-hotu bele asesu no aprende importánsia hosi korrupsaun ne’e.

“Ohin asina ona no tempu badak sei impelementa iha eskola rua no sei introdús ba iha kurrikulum edukasaun nian tanba programa ne’e sei kolabora ho ministériu edukasaun,” nia dehan.

Diretór Jerál Ministériu Edukasaun Juventude no Desportu (MEJD), Antoninho Pires, dehan importánsia edukasaun antí korrupsaun iha eskola nu’udar fundamentu ba prevene korrupsaun, ida-ne’e pertinente tebes nune’e hatene importante no razaun edukasaun antí korrupsaun iha eskola.

“Pertinente tebes, ita atu hatene importante razaun edukasaun antí korrupsaun iha eskola tanba liafuan korrupsaun ne’e mai ha’u muitu abstratu tanba iha nia forma ne’ebé ita seidauk entende didi’ak, tanba nia forma muito ampla. Ne’eduni, ita hotu presiza tenke buka hatene tanba dala barak ita hatene ne’e, na’ok mak korrupsaun maibé verdade iha mós forma seluk,” nia dehan.

Tanba ne’e, presiza formasaun umana ne’e hahú agora tenke koñese saida mak korrupsaun ne’e rasik no saida mak forma korrupsaun, entaun presiza hahú agora hatene korrupsaun, oinsa prevene, nia konseitu, ninia maneira oinsá labele entede de’it na’ok mak korrupsaun.

“Entaun ita forma ita-nia an buka atu hatene atu hakbi’it an, nune’e bele domina konseitu sira-ne’e, bele domina parte forma sira-ne’ebé haknaar-an iha ne’ebá hodi hasees-an hosi ne’ebá, entaun presiza duni edukasaun antí korrupasaun iha eskola,” nia dehan.

Diretór Eskola São Pedro Comoro, Pe. Matias Pinto, SDB, hateten liuhosi asina nota ne’e CEAPD sei servisu hamutuk ho eskola rua hodi fó formasaun ba estudante sira, nune’e hodi evita korrupsaun iha Timor-Leste.

“Ideia ne’ebé mak d’iak tanba ita haree ba realidade presiza haroin joven sira liu-liu estudante sira atu nune’e bele evita korrupsaun ne’ebé mak akontese iha ita-nia rai-laran,” Pe. Matias dehan.

Diretór Eskola Sagrada Coração de Jesus (Sacrojes) Becora, Helio da Costa, hateten eskola rua prontu kolabora ho CEPAD ba programa ida-ne’e hodi bele aumenta no hasa’e estudante sira-nia koñesimentu kona-ba saida mak korrupsaun.

“Ami prontu kolabora ho programa ne’e no hein katak programa ne’e la’o di’ak no sei involve estudante sira hotu iha eskola rua ne’e,” Pe. Helio hateten.

Membru Asembleia CEPAD no atuál Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jenerál Falur Laek, husu atu harii “ativu nasionál” iha Timor-Leste hodi prevene korupsaun.

“Ha’u hateten ba akadémiku sira no governante sira no polítiku sira, se atu kombate buat sira-ne’e hotu tenke harii ativu nasionál, ativu nasionál ne’e ha’u hateten beibeik ba ha’u maluk sira,” Tenente Jenerál hateten.

Tenente Jenerál ne’e husu atu ema hotu-hotu iha Timor-Leste tenke hanoin hanesan ne’e nune’e ba interrese nasaun ida-nian hodi kombate korrupsaun mak tenke harii “Ativu Nasionál”. Entaun “ativu nasionál” mak bele hodi kombate korrupsaun nune’e tenke hanoin interrese nasaun ne’e nian mak hotu-hotu tenke hamutuk hodi kombate korupasaun.

Jornalista : Osória Marques

Editór       : Cancio Ximenes

iklan
iklan

Leave a Reply

iklan
error: Content is protected !!